【返工見家長】公司開放日 廣告人帶媽媽上班體驗職場生活
這天，家長帶着簽妥的回條，「校長」介紹子女在過去一、兩年內的成績，有家長主動向「校長」表示擔心女兒凌晨回家的安危。這個不是學校的家長日，而是一家廣告公司的家長日。
廣告行業出名「爆肝」，凌晨一、二時才回家也是等閒事。家人不解他們的工作性質，時常都會問：「其實你份工做乜㗎？點解又咁夜收工？」為此，Secret Tour Hong Kong特意舉辦「家長日」，解答家長疑問，讓他們參觀辦公室。席間有位媽媽努力地舉着手機拍照、錄影，她是設計總監Lin的媽媽——林太：「佢10歲嗰年去文化交流，我為咗佢特登買咗部成萬蚊嘅卡式帶錄影機。」
昔日的卡式帶換成智能手機，科技日新月異，Lin也長大成人，媽媽對兒子的關心依然不變。
攝影：馮嘉雯
雖不太認識廣告行業，也為兒子感到自豪
上一次兩母子一起畫畫已是十多年前的事。這天，家長跟在子女旁邊體驗他們的工作，阿Lin教媽媽用軟件Illustrator畫畫：「廿幾年再嚟玩小畫家，幾搞笑。細個係我捉住佢隻手畫，而家係佢捉住我隻手畫。」
阿Lin小時候學習小提琴，還與林太一起上親子班學古箏。林太致力栽培阿Lin走音樂人之路。誰知阿Lin大學卻選了廣告設計：「我唔認識（廣告行業），我唔知前途係點樣。後尾我諗諗吓，覺得廣告可能都同藝術有關，所以冇反對。」起初，林太對廣告的認識只是停留於電視和雜誌。
當問到兒子有份参與的廣告項目，她格外興奮，笑不攏嘴；阿Lin畢業後首個參與的項目是地鐵月台的廣告牌：「嘩！好靚啊！我即刻走去影好多相啊！好開心！」當親戚朋友知道Lin從事廣告設計，林太也感到自豪：「我啲朋友讚佢叻仔！哈哈哈！」
淩晨才回家：唔可以早啲收工？
縱然欣慰，但是眼見兒子最早也要凌晨1點才回家，有時更是2、3點才回家，心中盡是不解：「你唔可以早啲返工，早啲收工嘅咩？」後來她才漸漸明白，廣告人的生理時鐘總是較晚的原因：「有時有啲嘢日頭做唔到，佢哋要諗橋，夜晚靜啲可以諗得好啲。」
阿Lin每天11點上班，習慣先瀏覽不同網站：「始終我做creative（創意事業）嗰面， 我哋好多時要好多input嘅。」日間的時間主要處理客戶的要求和查詢，到了晚上才是他們工作的核心——構思廣告的設計、意念：「大家一齊傾 ，傾傾吓已經去到午夜、深夜。」這天，公司負責人Stephen也有向家長解釋，林太也明白他們工作的難處：「佢嘅老細都有講嘅，你臨收工先收到，聽日要嘅你咪要趕囉。所以我明白嘅。」
等夜歸兒回家才睡：如果我早瞓，咁咪唔使見面？
林太是一名普通話導師，工作也不定時，為了見兒子一面，晚上在家會竭盡所能撐着眼皮等Lin回家才睡：「如果我早瞓，起身有時我起身佢未起身，咁咪唔使見面？所以我成日都好夜先瞓，等到佢返嚟。」兒子初入行，林太還會鍥而不捨地問：「今晚返唔返嚟食飯？」後來乾脆不問了。兩母子，一星期也沒有幾天能一起吃飯，所以他們格外珍惜周末相聚的時間，兒子Lin：「星期六日夜晚一定留返喺屋企食嘅。」
羽翼長成，如雛燕舉翅，父母聲盡呼不歸。工作霸佔了親子時間，然而，林太眼見阿Lin享受自己的工作，也沒有想過要他轉行：「我覺得佢對工作好有熱誠。最緊要係佢畀心機做，做得開心就得啦。」
老闆：管理層能知悉家長的憂慮
家長日的想法出自Secret Tour Hong Kong的員工，所屬的營銷集團The Bees Group行政總裁曾錦強，這天以「校長」身份出席。入行20多年，曾錦強說父母也不太明白廣告的工作：「點解Office工都可以半夜先走？」他說，這次的活動讓家長了解子女的工作，也讓管理層知道家長的憂慮：「有媽媽擔心咁夜搭的士返屋企，家人都有心痛係好自然嘅事。有呢啲溝通，管理層可以諗下有冇方法可以避免（同事獨自夜歸）。」