大埔寶湖手造藤器老店不日結業　老伴離世八旬妻怕睹物思人

大埔寶湖道街市內，財嬸坐在藤器店內，拐杖伴在她身旁。她說賣完最後的存貨就會結束「財記」——她和老公打拼多年的店舖。店內的所有貨品皆由他倆親手製造。兩夫妻80多歲，結婚60多年都是互相扶持，由一起在工廠工作到自立門戶，含辛茹苦養大3名子女。
今年農曆新年前，財叔跟財嬸說好：「我老婆捱得好淒涼，今日過年，買過兩條新褲畀你着。」誰知，這個約定還未兌現，財叔那夜就入了醫院，過年前離世了。說起往日艱辛的日子，財嬸總是不自覺地將這個「約定」再說一遍。沒有丈夫送的新褲子，如今財嬸看着他倆努力建立的財記漸漸消逝。
財記的故事，由60年代曾氏夫婦來香港開始說起。

風光一時的藤器生意：每日出車送貨

財叔與財嬸在內地相識、結婚。60年代初，他倆偷渡來港謀生。財叔最初在藤器工廠工作，後來在家裏開設山寨廠，二人合力經營。那是香港工業起飛的年代，藤器生意也曾經風光，一度有10多位員工，每天出運貨到新蒲崗、觀塘、油塘。財嬸還記得以前跟車送貨，汗流浹背，連褲腳也濕透。用揹帶揹着子女起貨，財嬸為生意通宵趕工也在所不惜：「做嘢唔勤力啲，捱世界，就冇金。」

財嬸獨自追數、不被「收陀地」：我唔俾人蝦

他們的生意曾引來別人妒忌，有親戚曾向他們借錢、借材料，所有員工被挖角，最後只剩下一人：「我老公問，啲夥記走曬啦，仲做乜嘢，又孭住啲細路哥，我話唔怕，繼續做！」後來，財叔着親戚還錢不果，本想放棄；財嬸卻誓不罷休，夜裏隻身走到親戚的工廠追數，親戚想打發她走，着她下星期再來，財嬸強硬地說：「你今晚唔畀曬錢我， 我一步都唔會走。」

最後，老公收不回來的債，由老婆追回來了：「我老公好容易話為 ，我唔得㗎，我唔鍾意俾人蝦。」財嬸的氣勢，似乎是人皆共知。約二十年前，他們在大埔墟自立門戶，財記正式開張後，也沒有人敢向她「收陀地」。此後，財叔主力做藤椅的骨幹，財嬸主力編織。財叔努力洽談生意，有時財嬸獨自顧店，守護着他倆建立的生意。約6年前，他們就搬進寶湖道街市。

冇生意，兩夫妻也可煮飯、傾計

然而，手造藤器隨着時代變遷，成了夕陽行業：「冇啦，有啲身體唔係幾好轉行。後生唔做，老就死咗，邊個做？太辛苦啦。」售賣800多元的藤椅，最少花上兩天製作，「食白果」時有發生。新年除外，他們幾乎全年無休；財嬸說，留在家中看電視百無聊賴，倒不如開檔，與街坊「打牙骹」，也為了不讓客人失望：「 一日200好、食白果又好都要照做，要日日嚟。你今日嚟聽日唔嚟，啲客人去邊度搵你，做生意一定講口齒！」

食白果也不要緊，兩夫妻開店一起打發時間，甚是甜蜜：「佢不嬲都好錫我，裝埋飯、裝埋湯畀我。」在店舖內煲湯、煮飯，吃飽了就在坐在店外聊天，財叔會摸着她的頭說：「喂，老婆你有冇食飽㗎 ？」財嬸說，街坊見到他們都會說：「佢兩公婆真係好得意。曾太，你老公好錫你，成日摸頭摸勢。」然而，天氣有不定陰晴，溫馨的景象也不是永恆。去年12月中，財叔氣管開始不適。過年前，一次痰多阻塞呼吸，救護車送財叔去醫院，就沒有再回來。

財叔突然離世　決定不日結業

財嬸是堅強的女人，這刻卻哽咽起來：「冇咗個老公，我好淒涼。年初一年初二日日都喊，夜晚黑返去開門就喊，睇到間屋自己單身一個好傷心，有時我瞓醒覺都喊。」財叔離開以後，財嬸也無法獨力支撐生意：「而家賣曬唔做喇，84歲。咁你無計啊，一個人就搞唔掂㗎，你唔退休都唔得。」

店舖內的飯煲也甚少再用，財嬸自己一個在家吃飯，或吃外賣就好。縱然失去最愛，相熟的街坊、旁邊的店主也主動幫忙開檔，又買飯給財嬸吃：「財嬸你唔好喊啦，你老公年紀咁大。始終有個前有個後，你要保重身體，你老公走咗，你整壞個身體，冇人保重你。」

街坊、江美儀探訪婆婆　「最開心係今日」

財叔離世的消息在網上流傳，大批街坊隨即來幫財嬸清貨。財記不日結業，街坊大嘆可惜：「啲藤椅好難搵啊！」10多年前光顧過財記的張生張太，這天也把握最後機會買藤椅：「特登出嚟買，因為呢啲舖頭買少見少，冇就冇㗎喇，無咗之後唔知去邊度買。」 電視節目《街市遊樂園》早前也訪問過財記，主持江美儀這天也特地來探望財嬸：「其實我哋做咁多街市，呢啲鋪頭真係越嚟越少。我哋做咁多輯，似乎藤器嘅舖頭都係得呢一間，仲係堅持有啲自己織、自己做。」

這天，一個下午就賣出10多張藤椅，其他藤籃、坐墊、煲墊一樣有人賞識：「我最開心就係今日，未開心過，唔笑都唔得，個個又幫你。呢啲係天安排，諗都諗唔到我做門市做到依家，係今日最好生意。」財叔離開，街坊依然有情，財嬸也覺安慰。只是熱潮過後，還望婆婆仍能堅強生活。