【我係喪屍】打工仔的星光夢：不想行屍走肉，做喪屍才是真我

一個基本簡單的喪屍的妝容，動輒花上四小時，每個造型花上千元。一道抓痕的血疤，劃破半邊臉，是用白色的膠漿與廁紙搓成條狀做成的。但落妝後撕扯下來一刻，「超痛，連眉毛都係扯甩。但痛，都係值得的。」如果喪屍電影的出現，源於人類對自己能力限制的恐懼，扮演喪屍又彌補了這群人現實生活中什麼缺口？
攝影：梁碧玲

因為喜歡演戲，沒有青春再去追夢而愛上扮喪屍的人，除了Eric，還有Davy（爆石）。（Eric的故事，請看下集：【點解扮喪屍】特約演員難突圍  替同志富商拍艷照：寧做沒人認得的喪屍）「所以我通常黏疤痕，都會貼埋個鼻，可以順便去黑頭，我講真的。」語罷，全場哄堂大笑。他跟Eric很不同，在喪屍家族裏永遠是牽頭放笑彈。單看他像朱古力奬門人的面相，已夠人樂上半天。「有好多韓瑪莉，朱古力味冇定企。」他的詼諧，人人都說他應該要做演員，他偏偏做沉悶刻板的工作——電子工程技術員。「我讀書讀電腦，順理成章做電子工程，呢份工帶比我錢，有錢，我才能追我的夢，現實逼我低頭。」他跟Eric一樣，都選了一條安穩的路。

【我係喪屍】特約演員扮喪屍4年　曾替富商拍艷照：寧做沒人認得的喪屍

扮喪屍叫，從唐老鴨開始

自少愛打「生化危機」的遊戲機，煲盡這個穿越冰河時期的系列電影。他說不同國家的喪屍，風格不一。如美式喪屍是「乾屍」，全身灰白；澳洲喪屍電影，卻喜歡血淋淋。他說香港有幾個喪屍群組，他3、4年前開始參與的Zombie Paradise 偏向血肉模糊的，跟走乾屍風格的群組甚少合作。

他中學時期就好喜歡演戲，曾參加過戲劇學會，「發覺唯有演戲，才能做到警察、ICAC、軍人。」因此，他現在最喜歡扮演一隻軍人的喪屍。「軍人有好多武器和道具，可以做到嗰啲括牆、欄杆的聲音，多啲唔同嘢玩。」扮喪屍的聲音，好像早就內置在他的嗓子裏。爆石自少喜歡扮聲，扮喪屍的怪聲要從扮唐老鴨開始練習。他又看韓國節目來「進修」，「叫人扮喪屍其實好難想像，節目教其實就係扮一隻垂死的駱駝。」至於喪屍那些一仆一碌生硬的步姿，皆因他有break dance的底子。

扮喪屍，改變我人生

「加入喪屍群組，其實係改變咗我人生。」一個打工仔，從前只會期待放大假去旅行，「𠵱家有一樣嘢係你每年都會期待。嗰種期待，係唔同。」他「爆石」的花名，因中學時期喜歡「爆石」而得之，他說扮喪屍就有「爆石」的爽。每年Zombie Paradise花半年籌備萬聖節的活動，「我哋一定會等齊人，幾十隻喪屍一齊衝上蘭桂坊斜路，幾十隻浩浩蕩蕩行出去，感覺好正，啲燈光五光十色，好似明星。享受過程，嗰種感覺係好成功，錢買唔到，所以好緊要。」，「打機，開心一陣。但呢樣嘢，開心一年，到𠵱家我哋都仲講緊。」他說成功感來自人與人之間的互動，「唔係想吸引人注意，而係嚇到人，然後人哋想同你影相，就會yes！佢認同我喇！」這種認同，不只是一種存在感，「有啲人又好驚，想同你玩，但又要避你，嗰種互動之間嘅感覺好有成功感，係平時朋友工作生活畀唔到你。」

「如果我真係一隻喪屍，老細鬧我，我一定噬佢一啖」

「係咪平時唔會有咁極端的情緒？」記者問。爆石：「其實平時會有，但你唔會表達出嚟。扮喪屍可以跳出咗本身人嘅性格。因為冇人會知道你係乜水，你可以放膽去做你想做嘅嘢。一啲你平時唔敢做嘅嘢。」不少導演以喪屍電影帶出對人性的反思，如《屍殺列車》突顯人的自私；《創世魔劫》帶出人類總要剷除異類的的批判。扮演喪屍，讓爆石有什麼反思？「會反思返點解扮喪屍之後，有啲嘢敢做，平時返工唔敢做嘅嘢？如果我扮咗喪屍喺條街度見到我老細，我真係夠膽去嚇佢鬧佢。」因此，扮喪屍，對其而言，「係一種舒壓、釋放。」

做喪屍，才不行屍走肉

「其實當我哋望出窗口，成班都係行屍走肉。我每一日都係行屍走肉，只有做喪屍，我先係做返自己。」，「希望有一日可以做到演員，但有點兒遙不可及。」