【我係喪屍】特約演員曾替富商拍艷照：寧做無人認得的喪屍

Eric赤著上身，在鏡前為那all back的造型忙了半天，髮型鬆了一根毛髮，梳一梳，鬆了，又梳，好像要為一個下塌的沙丘，不斷堆沙。記者問：「其實你扮喪屍，點解咁著緊個髮型？」在場的喪屍好友即喊：「係啊！佢自戀㗎！」訪問時他偏愛對著鏡頭，沒瞥過記者一眼。他這樣介紹自己：「大家好！我是Eric。我是一名健身教練，睇個樣好似好後生，其實我差不多四十歲。」俊俏的外貌，先後參選香港先生與亞洲先生，「我離開TVB之後，拍過戲，拍過《選老頂》、《使徒行者》、《貪狼》。」骨子裏性格高調張揚，表演慾旺盛，卻對娛樂圈頭也不回，甘願做一隻喪屍，以妝容掩飾自己一段充滿挫敗的過去。
攝影：梁碧玲

做喪屍最高境界：係喪屍帶我進入角色

「點解我會參與喪屍呢，因為我覺得可以發揮到我嘅演技。平時行出街，用一個正常嘅外表，但化妝之後，可以投入另一個角色做另一樣嘢。」在喪屍化妝工作坊上，他飾演骷髏王，黑白色的面容，認不出他原來的模樣。妝容下看不出他的表情，卻用肢體表露出骷髏的一點高傲。想不到剛才那個只顧照鏡的肌肉男，對這個角色花過工夫，竟然如此認真。

他對喪屍的認真，甚至有點可笑。變成喪屍有4年，曾扮演過寵物喪屍（Pet Zombie）、棒球裁判等喪屍造型。當記者問如何飾演不同喪屍的角色，他說起初毫無概念，以為只是瘋瘋癲癲，他說：「其實唔係我去諗，而係喪屍帶我去一個境界。」一隻業餘喪屍，卻說著詹瑞文的談吐。「喪屍其實有很多種，例如痛苦，中槍，吐血，你要諗返自己被感染的時候，係啲咩感覺。例如當我失去親人，點樣悲傷，要諗返嗰種感覺，帶我去行。」喪屍有情感的嗎？「唔同死因，變咗喪屍之後都有唔同的形態。有啲可能好瘋狂，有啲好似冇乜表情咁喺度行，」他示範，傷心而死的喪屍多會蜷曲身體，「你嚇他可能都會驚返轉頭。」；冤屈而死或許會突然瘋狂地亂咬一通，「但其實佢哋係有少少意識。掌握呢樣嘢就有一個難度。」他入戲，說得像真的一樣。

曾參選港男 擺騎呢甫士搏出位

他中三後輟學，26歲兼職做康文署救生員，夏天開工，冬天無業，做過紮鐵等散工，因沒有穩定收入，頓感處於人生低谷。29歲才膽粗粗去讀毅進，曾在消防署做救護員。同事鼓勵他參選港男，「有同事同我講：『其實你咁鍾意操肌肉，不如你試吓選吓港男。搏一搏啦！』」當年他成功晉級12強，拿過「pose王」獎，「以前我真係好騎呢，擺好多騎呢pose。」結果引來對手的杯葛，他搭搭別人的肩膀被叫彈開，「有啲直頭無視你，」甚至向經理人投訴他，在傳媒面前擺騎呢甫士搏出位。

賽後出賣色相     換不到一場戲份

「但港男，令我睇到另一個途徑可以入娛圈。」「要突圍而出，好難。港男亞男，只係一個綜藝節目，一個㘌頭。選嘅時候，五光十色，報紙雜誌又登你，你個心咪會紅。咁可能會做錯一啲嘢。」賽後，有很多人遞上卡片。一張卡片，卻是一個掙扎。有不少闊太看上他，跟他說：「嗱，嚟緊我會有套戲想揾新人拍。你不如出吓嚟見吓面溝通下。」當然，出來後又是另一個版本。「佢哋一定要繞住佢行勻成個置地廣場、Joyce，炫耀一番。」年過60歲的闊太跟他分享寂寞的婚姻，「乜都傾，講講吓就講咸濕嘢，『你陪我上吓房做乜都得㗎，陪我沖涼㗎喎 !』」跟闊太出過兩次街，胸口被蹂躪，換不到一場戲的對白，卻換來一個LV手袋。「我冇嘢嘅，我咪話當佢係媽媽陪佢行吓街。」

被同性戀富商看中，是每個港男必經之路

「你永遠分唔到嗰個人真係想比套電影你，定係另有企圖。」Eric說，「佢哋唔會好露骨，阿太其實已經好皮毛。」他說被富商同性戀者看中是每位港男必經的階段。有香港富商曾藏有6萬多張男明星豔照，因非禮他人被判獄。6萬多張相中，其中一人有Eric的份兒。「佢有call過我，又話叫咗翟威X出嚟，喇，到時你都有得同佢哋合作。過一星期，單獨約我出嚟，『有啲嘢我想私下同你講。』」富商帶他到其專放衣物的寓所，直接叫他開價，他乾脆說1億婉拒，富商退而求其次，給他5萬元私影一輯泳褲照，「佢叫我擺騎呢甫士，伸脷嗰啲，我唔擺。」

上集：【我係喪屍】打工仔的星光夢：不想行屍走肉，做喪屍才是真我

特約演員一句對白得來不易

男人的肌肉，圈裏圈外亦只是被觀賞的玩物。他後來在酒店裏做救生員，「酒店救生員，其實服務性工作較多。突然有人叫你沖嘢飲，同政府救生員唔同。」酒店救生員重視長相，「放你喺度，其實係一件裝飾品，好似服務台放一個靚女喺度。都有救人，但係唔多。」後來他經同事介紹上電影公司試鏡，人生出現曙光。

他好堅持自己不是「茄喱啡」，而是特約演員，「有對白的。」2015年，他參與第一套電影是《選老頂》，「好開心，第一套已經有3句對白。」他話要在百人之中，爭取一句對白，得來不易。片場很混亂，有好多特約演員企埋一邊隨時做後備，他憶述有次甫到片場，原本預定可以做反黑警員，後因工作人員沒通知他帶一件恤衫，「唉，咁你做返蒲友啦！」帶領演員的「帶隊」好心，為他張羅一件恤衫，他又從蒲友變回反黑組。「副導同我哋講，有邊個警察想行頭，個個冇出聲，我話我行出嚟。」鏡頭給他一個特寫，他形容是意外收鑊，開心到飛上天。導演邱禮濤認得他，第三組戲叫他行出來，說要給他一句對白：「佢話『喇你攞住大聲公，叫肅靜，肅靜，全部同我肅靜。』」一句觀眾沒可能留意的對白，幾年後他依然覺得是光榮。

不再追夢，回到現實

「但之後，發覺原來唔係嗰回事。幾句對白，只係巧合。好難捱到有出頭天。」2014始，3年來Eric拍過30至40套戲。他曾經以為他可以一直去追夢，還自覺自己演技「開始唔夠用」去學戲。他常說那句「係角色帶你去行」讓人能聽出耳油的說話，就是那時學的，一直記到現在。但將近40歲，還是要走回現實。

高調帶來挫敗   寧做沒人認得的喪屍

「那時好喜歡拍完啲戲，放上facebook。後來發覺冇乜作用。有時我啲朋友：『吓，你喺邊度，睇你唔到。』佢哋唔知原來已經過咗我底線。佢哋唔知做特約演員要突出自己有幾難。後來索性唔甫相。』」他兩年前已刪掉了Facebook的帳戶。他寧願每年一次做一隻開心快活的喪屍，「呢度（Zombie Paradise）唔同選港男，好似一個家，好温暖。」，脫下面具，踏踏實實做一個健身教練，偶爾展示一下肌肉，自豪一番。