【迷失地鐵】路痴惡夢：旺角尖沙咀尚可浪子回頭　但鰂魚涌冇情講

地鐵站本來就是路痴的恩物。落車後按著指示去出口，鄰近的街道、大廈都列在指示上，理應很難出錯。但有誰會想到，未去到地鐵出口前，路痴如我已迷失在地鐵站裡。

新西人的本能反應——美孚太子就要轉車

搭車是一種本能訓練。從小住在天水圍，自中五開始植入了一種本能反應——去到美孚、太子就要轉車，成件事自然到好似飲凍檸茶一定要叫少甜少冰。

與朋友多數去旺角、尖沙咀，例牌先坐西鐵到美孚，然後轉紅色線搭落去；畢業後在九龍灣讀過兩年書，更要搭西鐵去美孚轉地鐵，再到太子轉綠色線。所以聽到「太子」、「美孚」兩個字就自動步出車站，比姑姐隻貴婦狗還要聽話。

可是，這些本能就一而再再而三令我舐嘢。有次由中環搭返去美孚，中途聽到「太子」兩個字，我就即刻落車，眼見對面月台有車埋站，仲一個箭步衝入車廂，心入面仲沉醉自己的好運時，抬頭一望個地鐵圖上面眨眨吓嘅燈，就大大聲X咗出嚟——「點解我搭咗綠色線？」冇錯，當你以為一切都理所當然的時候，背後有把聲話你知「你只是一個傻仔，怪就怪你不帶眼搭車」。嗰一刻，我冇怨，我只是氣憤點解不運用自己的雙眼，而只是靠心眼搭車。當下，我死死地氣步出旺角，走返去荃灣線時，才驚覺原來中環搭返去美孚係根本唔使轉車。

將軍澳＋寶琳＋康城＝輪迴一萬年

有人可能會話：「你一定掛住督電話先係咁啦！」的確，若果我住得近市區，或者每日只係搭幾個站返工放工，我都唔會明白點解可以搭錯，但當你已經轉車轉到失去靈魂時，很多超現實的事情自然會發生喺你身上。

有次入去坑口工作，要在將軍澳站轉車。當時看見月台寫往寶琳／康城方向，就覺得每架車都到坑口，但我上車後聽見「下一站康城」，內心一沉，本能反應下立刻出門轉車；當車門關上時，開始覺得不對路，「其實係唔使落車㗎喎！」我內心狂吼，但一切已經太遲。我望一望手錶，還有10分鐘就夠鐘了；當列車再到將軍澳時，我奔上對面月台的車，希望趕得及不會遲到。可是，當廣播再次響起「下一站康城」時，腦袋頓時一片空白，「我放棄了。」那一刻我覺得很累——由天水圍坐了兩小時到將軍澳，只差一個站就到坑口，為何最後一步都要阻我？我看著地鐵圖上將軍澳、坑口與康城形成的三角洲，開始相信有些事情是解釋不了。

「睇清楚咪冇事囉！」我猜很多人都會這樣說，但兩小時的車程等同香港飛往台北，平時落機都可以洗面唞一唞，但那刻又趕時間人也累，確實沒有氣力再去細望。

鰂魚涌出口　月台決定命運

當你起程時沒有上錯車，轉車順利的時候，自然就會疏於防範。可是，往往臨門一腳就出事——選錯出口。地鐵並非所有車站都善待路痴，給你一個重來的機會，意思即是當你出錯出口時，還可以原路折返到地鐵站裡，重新走到正確的出口。

旺角站、尖沙咀站給你犯錯的機會，但鰂魚涌則沒有情講。鰂魚涌A出口往太古坊，C出口則是往模範里。曾經在鰂魚涌落車後，隨人流往上走，到C出口時才恨錯難返。當我原路返回地鐵站時，以為可以重出太古坊，那些閘門已終結了我的幻想。我唯有再度轉身，頭也不回走出C出口，經地面行15分鐘到太古坊，當時看到那個A字覺得特別剌眼。

經常迷失在地鐵站裡，我曾經以為我是孤獨的；但聽著聽著網上不少傳聞，就開始懷疑這或許不是我的問題，而是地鐵真的存在一個結界。