唔去旅行留港一樣可以「走佬」！90後畫著草地圖發掘香港好去處

在這世代，似乎人人都想走佬，據保安局數字，去年便有7600人移民外國；一年去幾次日本旅行是「廢青」習慣。冇錢走佬，又點算好？90後Sharon和Tiffany雖曾多次出走，留學又旅行，甚至跑去工作，但走在異國的街上，她們卻不由自主地聽着香港的收音機、看遊行的直播。「哎呀走唔到啊……」她們悲慘地叫着，然後扁着嘴說：「咁不如喺香港走佬啦。」
於是她們做出一份「香港着草地圖」，教人搭電車走佬、去彩虹邨打波收風，還列出練跑好去處，Sharon說：「生活中很多瑣碎的東西都可以重新定義。」

香港仔買魚補給　天光搭船去離島着草？

Sharon和Tiffany是中學兼大學同學，同樣讀藝術，最近推出「香港着草地圖」，列出37個走佬好去處，還畫出深水埗和上環2條特別推介路線，本周六將舉辦發佈分享會。

在香港走佬，會是什麼光景？「可以去香港仔買魚補充營養，之後一天光就搭船去離島，仲有可以去彩虹邨打波收風。」去收什麼風？「邊到食嘢平，邊到搭車囉。」

說是着草，其實更像是去玩。「記住唔好搭地鐵因為會畀閉路電視追蹤，要搭電車因為夠平夠慢，俾人追到可以跳車。」她們說希望藉着走佬的幻想，讓大家重新認識香港。於是她們叫人去太平山街的廟求平安，告訴人中環有特色廁所，並不忘加插幾句介紹：原來太平山街曾有鼠疫、威靈頓街有1913年已建成的公廁！

曾經區區有泳棚　出產著名女泳手？

「香港其實真係好刺激，清朝時啲犯避難落嚟，又有張保仔、五億探長。我成日覺得得港先有呢啲咁奇怪嘅嘢，但冇人去研究。」Sharon興奮地說。製作地圖時，她更發現大家的打卡熱點西環泳棚，原來見證着香港的泳史。「我哋唔單止多人游水到每一個區都有泳棚，仲離譜到有女泳手，會去大陸比賽（註：楊秀瓊曾於1933年參加全運會奪得五面金牌，1936年代表中華民國出戰柏林奧運會。她一直於七姊妹泳棚習泳）。當郭晶晶要嚟香港表演跳水時，原來我哋有個女泳手，曾經都好厲害。」

單車叔叔趕返工仲帶路、招呼上屋企？

有次她們跑去找大埔神木，遇到個踩單車的叔叔，「佢去緊返工，我哋問問下路佢帶埋我哋入去，我心諗，吓，你唔係返工咩。」Sharon瞪大眼說。「忽然佢又招呼我哋去佢屋企，佢天棚種咗好多嘢，又教我哋點種。你點會招呼個陌生人上屋企，然後同人分享咁多嘢？」Sharon難以置信地說。然後叔叔真的要去上班了，5分鐘後卻又回來，說：「天黑啦，啲惡狗會放出嚟㗎啦，我帶你地出去啦。」

「我哋成日以為要去外國先會有呢啲好溫情嘅事，其實香港都有。」Sharon微笑着說。她們更在資料搜集時和香港的有心人相遇。「我哋參加咗中西區關注組嘅導賞團，先知道有人爭取保育，仲有牛棚、藍屋。原來都好多人關心香港，都有成功保育嘅嘢。」

然而在此之前，其實她們一直很灰。她們覺得大眾大多都不了解香港，任由有價值的歷史建築被拆毀，任由這地變得不再熟悉。在興高采烈地解說地圖的同時，其實她們有一半時間都在質疑：「做地圖有咩用？」，又說「我們印（第二版）一定沒有政府剷走得咁快」，說着常常就陷入靜默。

那些靜默的時間，藏着什麼心事？詳看下集。

香港着草地圖搞事派對 Jack Ciao Map Launch Party
日期：9月9日（六）
時間：晚上8時
地點：艺鵠（灣仔軒尼詩道365-367號富德樓14樓）