【攝影情人】用鏡頭談情　陽光加持　拍出戀愛中的驚喜

看他們的照片跟文字，我會形容像森林中的小鹿，偶然清新、感性，偶然神秘、跳脫。
Vani的Instagram裡，大多是她自己和其他被攝的朋友們。而Zenith的Instagram裡，幾乎全是Vani跟一些景物。

雖然都是男友視覺，但Vani和Zenith所挑選的相，卻有截然不同的感覺。做訪問之先，因為不認識二人，於是把他們的Instagram（vanibusca／zenithsphere）從頭看一遍。才發覺，Vani呈現的自己，是優雅文靜的，在男友眼中，卻多了一份搞怪可愛的感覺。

「影相對我嚟講係舒緩壓力。」

「透過攝影釋放身體能量，好似放咗一場假咁，之後再返去自己嘅工作。」

從大學時期認識的二人，拍拖四年，他們平日最愛的活動就是「周圍影」。「讀書時期會一齊上攝影堂。一部digital、一部菲林，一人孭一部出去影，唔使用好多錢就可以玩一日，呢個拍拖模式唔錯喎。」Vani興奮地分享。

未拍拖之前，二人早已對攝影感興趣：「中學時無聊拎住部DC去公園影，其實過程已經好滿足，可以capture到自己喜愛嘅事物。依家多咗平台放自己嘅攝影作品，如果其他人都鍾意，就會更開心。」她亦笑言以前無拍拖，哪來的拍攝對象。對愛拍景物和死物的Zenith而言，拍拖後令他愛上拍攝人像：「以前好逃避影人，因為生活對得人太多，有時想抽離一下。拍拖之後覺得，發現好多時生活都離不開人，又想同女友之間有更多回憶同記錄有趣嘅時刻，另一方面去留低自己嘅痕跡，慢慢鍾意咗影人。」

「女仔對女仔嘅靚、角度、佢哋嘅執著可能係男生無嘅。」

「佢影女仔，其實係似女仔影女仔。」

攝影反映個性

大學時，一個修讀視覺藝術，一個修讀公關廣告，訪問時亦看得出端倪。Vani吱吱喳喳地分享的同時，Zenith卻是默默的在聆聽，待女友說完，才提出前一個話題的答案。攝影中反映個性？這是肯定的。「佢份人諗得比較周詳，心思比較細密，要好有信心先會做。例如影人像要約一個人出嚟，如果未去到佢心目中好完美主義嘅影像，佢就未必會去影。我個人比較衝動，想試就試。可能咩都未諗，想要影一個人就去約。」兩個愛攝影的人，互相欣賞之餘亦會互相學習。「未識佢之前，唔覺得死物或者景物有咩特別。但佢對於世界經常性都好好奇，坐坐吓地鐵，突然指著話呢度好靚，我望一望，心諗好靚咩？我成日經過㗎啦。跟佢影相多咗，發現唔係喎，真係幾得意。」Zenith補充：「影相係由心而發，如果刻意地做一件事，就未必係嗰種感覺。」

他讓我放下執著

有時候，即使同一個地方，跟不同的人、不同的陽光、不同的情緒，就會產生意想不到的效果。「好多時我哋會忽略咗好細微嘅事物，可能突然有道陽光加持，就好似發現了新大陸咁。而共同捕捉到美麗嘅一刻，呢個回憶喺屬於我哋嘅。」Zenith在分享自己的攝影態度。自言較衝動和執著的Vani，指以前拍照都是有「目的性」，決定好這裡，就要「死磨難磨」誓必拍到好照才肯擺休。相反，Zenith卻喜愛從周遭發掘有趣的事。經幾年時間的「調校」後，她終於學懂放下執著。她分享一次有趣的發現：「地下有一個被遺棄嘅維他水瓶，以前會心諗，行開啦，然後踢走佢。雖然佢只係一件垃圾，可能係人哋做完運動隨意拋低。但配合埋陽光穿透嘅折射、剩低嘅水，夾埋嘅效果幾靚。」

「有時對慣咗一個地方，你知道有所限制，唔會靚得去邊。但外國人嚟，會覺得香港好有特色，影咗好靚嘅相。本地人先發覺，係喎！好似幾靚，然後去模仿。但其實係咪可以倒轉，由我哋去尋找香港嘅美麗呢？」

對方眼中自己的美

攝影，就是將最美一瞬記錄。問起最欣賞對方哪個角度的樣子，Vani沒有一刻猶豫：「我鐘意佢微笑，佢嘅微笑比起其他男仔溫暖。」藏不住笑容的Zenith卻回應：「佢有講過，雖然我唔係好明。」她繼續分析：「男仔影相鍾意打造一個型格同帥氣嘅感覺，但有時顧住要型就會忽略咗自然嘅動態。有啲男仔一拎起部機就會chok樣，而佢可以好自然咁笑。」至於拍攝女友可謂得心應手的Zenith則表示，「佢有時整蠱做怪嘅樣，我都幾鍾意。我好鍾意觀察光線喺佢身上嘅感覺，透過影相嘅過程去觀察佢。」

「別人鍾意點定義，就由得人。最重要係相中見到自己，人哋見到就會知道係我影嘅。」

「我影嘅相，人哋未必覺得好生活化，但其實佢就係我嘅生活。」

定義文青

文青這個詞，是別人給他們定義的。Vani定義他們只是愛攝影的人，「坊間被稱為文青，通常係影小清新嘅，咁我哋嘅相色彩的確唔係好濃烈。我無特別去界定自己，如果定格自己，可能阻礙自己嘅推進。」如果用一種顏色去形容他們倆的Instagram，大概是「粉色」。自認有視覺「潔癖」的Vani，以前看不順眼就會馬上刪照片。可現在，她卻想嘗試其他的色調。「其實最近色tone上有啲亂，想跳出自己嘅框框，除咗小清新同陽光，都想影吓夜景。」

情侶拍攝小分享

Vani笑言男友拍攝人像的技巧是經過四年訓練出來的，「一開始我影佢或者佢影我，都好似影得好怪咁，未係好磨合到同熟悉對方。後來慢慢會發現，對方影出嚟係一個好自然嘅自己。」訪問的最後，當然少不了讓他們分享拍攝和被拍攝美照的心得，Vani立馬搞笑「拋波」：「你講先，係你專長！」

他們有以下的提議：

Zenith：「１）唔好太限制女朋友點樣擺pose，例如個女仔唔適合做個pose，唔可以太過粗暴咁命令佢，好似好嫌棄佢做唔到要求。２）應該要多互動，只要互動得開心，自然會影到好嘅相出嚟。３）仲要多觀察佢，如果不留意佢，就算擺出公認靚嘅pose，都影唔到啲咩。４）重點係培養情感，繼而投放喺相入邊。」

Vani：「可能每個人審美唔同，有啲男仔會鍾意女仔擺定一個pose，覺得好可愛好正啊。佢同我影相嘅時候，我可能好刻意嘗試做動作令張相靚啲，佢會話：『唔使啦，自然啲得㗎啦！』我影人其實同佢有啲似，但未去到好似佢咁投放自己嘅感情，可能佢情感比較豐富。我注重捕捉自然神態，同整個畫面嘅感覺。」

不刻意地「放閃」，純粹地分享他們對生活的感受。或許，這就是照片充滿吸引力的原因。