【多圖】30歲樂瞳決心回歸樂壇 畀3年限期自己：冇起色會轉行！
大台小花樂瞳，上星期已與合作多年嘅TVB結束賓主關係。早前樂瞳接受《香港01》音樂組Bingo訪問時表示：「我係歌手出身，就算簽tvb經理人合約，我都係想做歌手。」至於問到將來去向會不會以做歌手身分為先，樂瞳表示：「其實現階段有幾間公司都表態想合作，佢哋都想以幫我出唱片為主，但除咗唱歌當然會有其他配套，佢哋都想我拍電影，都會想幫我打入內地市場。現階段我想真空一段時間，好好諗清楚每一個決定，唔想隨便簽公司。我覺得選公司好似選男朋友一樣，唔可以隨隨便便，因為哩一段關係將會維持三年。我依家30歲，所以我會再比3年限期自己，3年後我想成家立室，如果3年後我事業冇起色我會選擇轉行。」
樂瞳：我真係無特登要去「釣金龜」，旅行都係一人比一半
樂瞳初出道就被網友選為「宅男女神」，除了樣子甜美可愛，仲曾經被記者影到出街打扮平民，鍾意街邊「篤魚蛋」，出入坐公共交通公具等。但近年樂瞳自拍拖後，多次被指情迷富二代，忽然富貴，頻頻外遊，又鍾意喺社交平台上炫富等，慢慢被標籤為「拜金女」，對於種種報導嘅指控樂瞳表示：「其實我有時睇到哩啲報導我都幾唔開心，見到網上有啲中傷，負面留言，不實報導令我諗，點解要針對我，我係自己賺自己洗嘅人，有人將賺到嘅錢去投資，買樓，我只不過選擇去多啲唔同嘅地方，想見識唔同嘅野。至於有好多報導話我「釣金龜」，我真係無特登要去「釣金龜」，我唔會睇男仔係咩背景，我覺得識男朋友最緊要佢真心對我好，我哋一齊開心，合適嘅先可以一齊。我記得之前有報導寫我同一位金融財俊拍拖，，其實佢只不過係一個普通嘅打工仔，我哋食飯好多時都係AA制，有時係你請一餐，我請一餐，我哋去旅行都係一人比一半。其實我都係一個普通嘅女仔，都希望有一段平凡嘅愛情，我希望同我另一半可以公一份婆一份，我都好希望同當時嘅男朋友可以行落去，我希望大家唔好再誤會我，我唔想拍拖係一種錯。」
「點解我成日去旅行，好似食好住好，其實係因為我身邊嘅閏蜜，佢哋都係事業有成，一個係Banker，另一個係一位音樂人，佢哋好識得做生意而且都識好多人，所以我哋成日一齊去睇騷，去旅行，而佢哋又有能力而且願意花錢去享受生活，所以我有時都會同自己講要做一個女強人，因為我身邊嘅閏蜜都好優秀令我有推動力去進步。」
其實睇下樂瞳社交平台上的生活照，都依然「仙氣」十足。
「我好想狠狠地反駁一次」
「我曾經因為哩類報導而唔開心，我好想狠狠地反駁一次，不過刻意去澄清又有咩用，因為下一次嘅報導又會寫唔好嘅嘢。我可以做嘅就係盡量低調我嘅感情事，因為近年嘅報導真係令身邊男性朋友對我卻步。」樂瞳語帶無奈說。