【我不怕唱歌】短髮「過江龍」唱得堅揪得 鄧小巧：我認得粒墨！
JW：佢把聲好易認
洪卓立：佢比賽嘅時候我已經覺得佢把聲好好聽，聽個名就知好好揪！
鄧小巧：我連佢粒墨都認到喺邊呀
呢位歌手似乎擁有一把極具個人特色的嗓音，而佢清爽嘅短髮亦成為咗佢嘅象徵，到底佢係邊個？
攝影：黃國立 許栢倫
剪接：許栢倫
嚟到第三集嘅《我不怕唱歌》今次哩位神秘歌手，當初係因為參加TVB選秀節目「超級巨聲」而入行，人仔細細歌喉了得，佢有一雙大眼睛，見到佢面上嘅baby fat真係好想「搣」佢塊面！哩位歌手入行後，有幾樣外在條件會令人諗起佢，第一，佢有一個標誌性嘅「墨」！放心佢唔係家燕姐。第二，佢係一位樂壇大哥！第三，佢喺台上唱歌可以話係揮灑自如。但你又知唔知原來佢有「舞台恐怖症」呢？
自小愛上音樂，為了追求音樂夢，隻身由澳門走到香港參加選秀節目「超級巨聲」，擊敗無數參賽者，最後得到前十名的佳績，從而入行成為歌手，所以佢真係好揪得！雖然佢係經選秀節目出身，大家會見佢唱歌嘅時候「淡淡定」，其實佢原來一直有「舞台恐怖症」，在台上信心並不如我哋表面所見。佢就係嚟自澳門嘅歌手陳慧敏（慧敏哥）
佢憶述佢幼稚園讀書嘅時候已經參加人生第一次嘅歌唱比賽。「細細個已經受爸爸媽媽影響，所以自小就有音樂細胞。我爸爸媽媽係張學友、徐小鳳Fans，佢哋支持偶像係要用恐怖嚟形容，佢哋可以洗碗又唱，睇電視都唱，所以慢慢我就愛上音樂。我記得我細個學識嘅第一首歌係一首兒歌叫做《夢中天使》（長腿叔叔主題曲）。當時讀緊幼稚園，學校歌唱比賽因為唔夠人所以老師叫我去參賽，結果我真係去咗。我當時參加完哩個比賽，並無令我增加自信，反而令我有「舞台恐懼症」，一上到台我會好驚，我怕畀人見到，自從嗰次比賽次後，我一生打後十幾年都無再喺其他人面前唱歌，直至入行頭幾年都係好騰雞！所以我覺得自己可以真真正正成為歌手係一件好奇蹟嘅事。」
由出道至而家都以短髮形象示人，陳慧敏嘅外表好似幾年都無變過。
慧敏哥7年前透過比賽入行，但係佢嘅星途絕對係得來不易。因為「超級巨聲」完結後佢並未有機會簽約唱片公司或tvb，當時眼見身邊一齊參賽嘅朋友都陸續成為歌手或於電視台做主持，自己只可以等運到，結果比佢等到，苦等三年後終於得到一紙歌手合約，所以唱歌對於佢嚟講係非常幸福嘅一件事。不過簽約唱片公司後都唔係事事如意。「其實我入行後曾經試過嫲嫲借錢畀我，因為我喺香港真係已經交唔到屋租，我當時已經係日日食２蚊即沖即食嘅米粉，出街連水都唔會買，當時我嘅生活真係好辛苦。又因為可能生活習慣唔好，所以腸胃炎，喺張床痛到行唔到，屋企又無嘢食，又無力，當時香港又無乜朋友，之後我打電話畀經理人公司求救，結果最後都係要自己辛辛苦苦落樓下搵的士再去睇醫生。其實我當時真係心諗，一個人嚟到香港，搞到自己咁辛苦為啲咩呢？除此之外，仲有一件事曾經令我好唔開心，就係曾經有一個經理人同我講過，叫我唔好做，叫我放棄，話我無鬥心，無機心，無爭勝心，無哩三種根本唔應該做哩行。佢當時係當面同我講，我聽到嗰一刻，真係幾乎崩潰。」慧敏哥說。
慧敏哥於今年推出了兩首新歌，第一首係完全無商業元素考慮嘅歌曲《慧敏歌》，她表示：「我而家做歌好簡單，我覺得我比到咩嘢出嚟我就做。因為而家嘅音樂市場唔係你話點計算，就可以有咩回報。倒不如我真心做一啲『作為一個人』應該要做嘅嘢。始終考慮市場嘅人太多，而我又無佢哋咁勝任，大家崗位唔同，我只係偏向無咁選擇。」《慧敏歌》係由佢自己創作，MV拍攝仲專登搵嚟昔日歌唱比賽嘅戰友吳業坤（坤哥）飾演MV入面嘅男神。「今次MV我需要搵一個男神，而我身邊嘅朋友只有佢係差少少可以就去到吳彥祖嘅級別，而且佢除左可以「扮」男神之外，佢又可以演繹傻傻奸奸嘅一面，所以我覺得佢係一個不二之選。」慧敏哥笑言。
而另一首最近派台嘅新歌《城市人》，內容則較為深省，慧敏哥分享一次真實經歷：「有一次我喺學校表演，我問啲學生『你覺得無水飲會死，定無錢會死？』而佢哋異口同聲咁答『無錢！』」眼見不少城市人的價值觀已被扭曲，所以希望藉著歌曲讓大家記得，憑良心做人。