林敏驄作品展靠笑話撐住　憂好友捧場變出醜：大家為我仲要頂落去

一連兩場的林敏驄作品展終於完場，一向鬼馬的林敏驄真情流露，向全場觀眾坦言：「我想講對唔住」，又哽咽謂好多朋友支持自己，怎料：「本身排好晒舞，而家個個要自己唱，個個嚟捧我，而家嚟出醜。」就連完騷訪問都承認：「真係好心痛，大家為我仲要咁撐住頂落去。」

其實要撐住的除了是一眾嘉賓，最重要都係阿驄自己，話說在前天舞台意外後，要保持成場騷都有歡樂氣氛一啲都唔易，幸好他的有味笑話繼續亂咁噏，除了話校長好怪，有蝦條就得，又拖住苟芸慧出場唱歌，阿驄叫現場觀眾：「隨便揸....佢隻手呀！」令苟姑娘哭笑不得，唱完《忘不了你》後，當住男友陸漢洋面吹水，問：「你係咪脫離處女黨呀？」之後苟姑娘鬆開手拿咪話：「拖住手講唔到野」，阿驄就話「你用手講野架咩？」，又話：「我打算開部戲叫《鐵金剛大破處女黨》，跟住又講起結婚，接著阿驄話結婚要好認真，要同佢做「詳細體檢」，就拉左佢落台，苟姑娘完全冇還擊之力觀眾就笑到哈哈聲。

有份為今次演唱會投資的黎瑞恩出場時，阿驄問小恩子第一次開製作公司，啲飛好快賣晒，不過個台塌咗，仲會唔會搞落去時，小恩子坦言：「有啲驚」，阿驄又開玩笑：「唔驚嘅，你咁大隻」，又再引起現場歡笑。而關淑怡尾場同樣在場，唱出了《梵音》和《午夜狂奔》，阿驄問她的情況時，她回應：「I'm OK，有你支持一定好啦！」阿驄隨即話，要畀啲正能量關淑怡。她其後又開口：「我好欣賞你架其實，從來都冇講過。」阿驄又開玩笑話：「表白呀你而家？」之後阿驄講到有一首歌一定要唱，但又冇講係邊首，結果關淑怡就回應，唔知係咪接着呢首，於是唱出《再會》。

除了和姐姐林敏怡同台演出外，後來登場的實力唱將杜麗莎亦唱出《假如》，更令自己唱到喊，雖然林敏驄只為她填過一首歌，但杜麗莎亦俾面賣大包送多隻《Can't take my eyes off you》給現場觀眾，難怪一見面時阿驄就已經賣口乖話：「你瘦左咁多嘅？」，只不過唱完歌後，杜麗莎離開台的時候，阿驄又潤她一句：「乜你行行下又肥返嘅？」認真抵死。

要數到演唱會高潮，自然係林敏驄的「無厘頭」演出喇，鄭中基同林敏驄咁老友，自然會為對方撐場，因為沒有中央的升降台，於是鄭中基與張智霖一樣，在觀眾席出現，唱出《最愛的你》，之後開始一唱一和變成棟篤笑。鄭中基笑稱：「我有咗小朋友多咗運動唔搭Lift」，又話「好彩尋日我唔晌到，唔係一定賴我架啦」，兩人又謂想了好多說話，隨即林敏驄話：「我地正式宣布，唔搞演唱會喇，林(敏驄)鄭(中基)搞talk騷！」鄭中基又話：「我出道果時，你就冚左旗喇，你唔寫歌我唯有唱自己歌」阿驄神回：「唔係冚旗，係拒載，除晒衫褲涼冷氣」，一句精警說話，除了抽的士問題外，仲抽埋近日網傳的士司機裸體涼冷氣，超勁！最後合唱《深愛著你》時，鄭中基唱唱下笑一笑，原來林敏驄掛住向觀眾微笑揮手冇唱過歌，即刻話：「唔好掛住揮手，唱啦！」