【我不怕唱歌】超唱得扮嘢王究竟係邊個？王菀之：完全唔認得！
王苑之：佢將我隻歌唱得好有希望
C AllStar：佢唱歌係幾有特色
有人話佢把聲夠晒特色，又有人覺得佢扮嘢好叻，到底佢係邊個？
攝影：梁碧玲 許栢倫 彭嘉彬
剪接：許栢倫
場地提供：通利琴行
成日話歌手唱歌要有特色，但諷刺地一個歌手扮嘢越叻，似乎越容易出位兼打響名堂。今集《我不怕唱歌》嘅歌手雖然嚟自澳門，但偏偏就喺網上扮人唱歌扮到出晒位。扮JM Tone唱《矛盾一生》又試過，扮魔音唱《Chicken Attack》又試過。不過聽返佢真正把聲你又知唔知佢係邊個？
一向在鏡頭面前彷似不顧形象，盡力把自己演繹得誇張，令節目《Sunday扮嘢王》也不禁多次邀請他上去扮嘢兼唱歌。不過他自言：「其實我個人係內向底，不過唱歌嘅關係，會令自己開心咗。呢段時間大家喺唔同平台見到我，會覺得我好似同大家好溝通到，好開心。但其實另一方面我又會不停同自己講『你都係講少句啦』。」呢位內心咁矛盾嘅歌手，就係嚟自澳門嘅彭永琛。
參加東亞唱片舉辦的選秀比賽而入行，琛仔表示自己從沒想過會做歌手：「我讀新聞傳播，本身諗住畢業就喺澳門做DJ或者記者。因為細個比人灌輸嘅概念好似做全職歌手都未必太正經。點知贏咗個比賽，順理成章做咗全職歌手，當下覺得個世界好似好開揚，又唔洗怕返工好似好悶咁。不過做咗全職歌手嘅過程先發現，呢份事業嘅辛苦原來同打其他工又唔同，尤其唔多嘢做嘅時候，你會發現原來成件事可以好虛耗。」
唔少人話以下照片很有張敬軒的影子，你覺得呢？
回望以澳門作紮根地的藝人，好像前路一般也比較難行，即使是曾經人氣高企的小肥和Soler，也難以把這份人氣維持下去，對此彭永琛亦有另一番見解：「以前我會認為澳門藝人的確需要其他地區的曝光和支持，但慢慢發現其實在任何一個空間，我們也先要準備好自己，尤其在網絡這樣方便的年代，你在適當的時候做一件適當的事，不論身處什麼地區的人也會看到。」
密密網上拍片唱歌，當中除咗改編大熱歌曲之外，為求網友睇得開心，彭永琛亦不忘加插搞笑演出。作為一個歌手，大概不多不少也會有一個偶像包袱，但彭永琛也漸漸看化：「而家最緊要開心，其實都無乜位置可言，首先我唔覺得自己係一個偶像。我的包袱可能是來自執著，當大家見到我很瘋狂拍片玩耍的背後，其實我有很認真的斟酌，而不是隨便企在鏡頭前便把影片拍完。」