【演唱會．多圖】周柏豪八嚿腹肌冧老婆：佢好偉大，為我做任何嘢

音樂是一樣很神奇的東西，可以將完全不認識的人變成好同事、好朋友、好兄弟，就好像周柏豪與陳詠謙這一對，他回憶道：「我同陳詠謙成日合作同傾計，會講吓大家嘅感情事，大家都知我感情事好低調，但如果大家有用心聽我嘅歌，又或者係好多年嘅fans，就會知我用音樂去記錄我同佢之間嘅經歷。」

一向很低調的柏豪首次提起自己的感情史，「我同佢係未入行嗰陣識，我同佢一齊成長，佢將最黃金嘅時間奉獻畀一個寫唔到包單嘅我，我知我好麻煩，係個麻煩友，喺身邊搵到完全體諒自己嘅人好難，但我搵到喇！」大家都不禁為柏豪歡呼，柏豪自己亦講到眼濕濕。

接著他透露還未結婚之前，女朋友與她一起成長生活超過十年時間，更大爆兩人相識過程：「我對佢係一見鍾情嘅，唔知佢係咪啦，嗰陣佢問我做咩，我答佢model 囉，佢話唔識你喎未聽過你個名。嗰陣時我好瘦，瘦到佢叫我做瘦奀騎，瘦同奀我都識寫，我問佢奀點解，佢話不大，不大咪即係細，你先細啊！」

回想起很多年前，柏豪有陣子皮膚很差，他形容那時候整張臉都是爛掉的狀態，當時他足足有三個月沒有工作，幾乎是零收入，他說：「嗰陣時我冇錢，佢甚至要經濟援助我，我冇錢買唔到嘢畀佢，唯有送《我的宣言》、《天光》呢兩隻歌畀佢。」

「好多時候我半夜有情緒問題，我會半夜叫醒佢，聽我講聽我唱歌，好開心大家諗嘢好相近，價值觀好相似，有時候大家會同一時間send同一個message，睇埋同一張相。11月我喺外地結婚，有個歌手同我講出面有狗仔隊，我好驚，唔知點算，個婚禮籌備咗好耐，本身我想好低調處理，佢問我個婚禮使唔使hold住，佢好偉大，可以為我做任何嘢。」聽到不止歌迷眼濕濕，就連柏豪自己也眼紅紅，最後他唱出愛的主題曲《終於我們》。

《無力挽回》這首歌給予柏豪很多力量，每一次都是傷心的經歷，他回憶道：「喺我出道時姑媽已經好老，佢知我呢個歌星仔喺馬𩣑山出騷唱歌，特登拎住拐仗篤吓篤吓嚟睇我，佢成日都嚟睇我唱歌，但佢成九十幾歲行動又唔方便，我同媽咪講等一陣下次同佢食餐飯啦，真係唔可以講等一陣，因為唔知會等到幾時，佢呢扎花雖然送唔到我手裡面，但呢扎花喺我心裡面，永遠都唔會凋謝！」