【演唱會．多圖】周柏豪慶幸自己「死好命」：冇點派歌都有人嚟睇

周柏豪入行十年演唱會《One Step Closer Pakho Live 2017》今晚開騷，未開騷已經逼爆紅館，門票上面寫8:15開場，門外歌迷排隊入場足足排到8:40先入到場內，一開騷，柏豪一身黑絲網紋透視裝，窩釘加上貼身皮褲登場，SM味濃！

「大家好嗎？今日除咗感激入場每位朋友之外，仲有睇Joox直播嘅朋友，我好想喺度講聲多謝！」柏豪接著剖白道：「其實我係唔屬於呢度，我係屬於2007年條片入面嘅錄音室助理，係因為你哋支持同掌聲先有呢個夢想嘅開始。」這個演唱會就是柏豪給歌迷們的回禮，而柏豪的太太亦有到場支持，陪著他一起實現夢想。

柏豪透露原來場內官方歌迷會的燈牌扣除成本後，將把餘下的款項捐給慈善機構，他解釋道：「做偶像其實唔係開吓演唱會咁簡單，偶像會帶嚟好多唔同影響，而我希望自己帶嚟嘅係正面嘅影響，我好開心，係自發去做。」

夢想是他在演唱會一直提到的話題，他坦言追夢要付出很多代價，令他不禁懷疑自己選這條路是不是對的，幸好他的歌為他打打氣，伴他走過這段路。他又慶幸自己「死好命」，他說：「我上年拍好多戲，冇點派過歌，今年走去開演唱會都有人嚟睇，好在身邊有班出生入死嘅朋友喺身邊。」

柏豪坦言自己是個怕「熱鬧過後」的人，「我好怕散band之後，我好怕失望，唔知下次見面大家都仲係咪咁，好怕講再見。」講完之後柏豪眼濕濕，粉絲馬上安慰大喊：「我哋都好怕同你講再見㗎！」