【專訪】Nowhere Boys歌曲藏彩蛋：想同Marvel一樣有自己Universe

電影式搖滾樂隊Nowhere Boys加盟寰亞唱片，並推出「Chur到盡」、歇斯底里的單曲《生死時速》。《生死時速》中主音Van挑戰自己的極限，一來歌詞密集，二來多個飆高音位置，冇食過「夜粥」真係搞唔掂。再者，電結他是主角之一，鮮明的失真音色，無論Riff或是Solo都非常搶耳。
攝影：葉志明

孭炸彈上身　逼自己進步

一看《生死時速》這個名字，大家自然會聯想到1994年同名經典動作電影《Speed》，戲中奇洛李維斯鬥智鬥力拆彈；而Nowhere Boys就當自己每日都「孭炸彈」，提醒自己不能鬆懈。

主音Van解釋背後的概念：「因為身邊好多朋友得個講字，隔咗好多年都仲喺嗰個狀態入面，又話後悔又唔開心。我就諗，點解平時我哋做嘢咁有決心呢？因為我哋不嬲當自己身上有個炸彈，一唔做就爆做錯決定又爆！所以就想將呢個壓迫感寫出嚟，然後魚佬(鍵琴手)諗到用《生死時速》去包裝。」

《生死時速》是如何煉成？

作曲如拍戲，放到Nowhere Boys尤其適合，今次《生死時速》由主音Van執導、鍵琴手魚佬編劇，結他手Ken、鼓手Nate及Bass手Hansun收到劇本後，合力演活Nowhere Boys時空中的《生死時速》。

結他手Ken分享：「結他方面，今次用到一種好Rock、好厚、好立體嘅Tone(音色)，因為之前Nate嘅鼓聲冇咁勁，但今次佢去咗紐約錄音，個Raw track好似唔使mix咁，非常有力俾到首歌好Energy。」

Ken提到，遠赴紐約錄製的鼓聲給予歌曲爆發力，到底當中有甚麼「玄機」？鼓手Nate解釋：「今次去到Brooklyn（布魯克林區）一間錄音室，用一套70年代Vintage Yamaha鼓去錄音。平時錄鼓，我會逐段去錄，揀啱個take先去下一段，但今次就試下成take過；依家大家聽到出街嘅鼓聲就係用緊最尾嗰Take，成件事好一致，energy係最好！」

Bass手Hansun分享一些與Ken錄音的趣事，他說：「本身我諗咗自己嗰part點彈，佢就畀意見話不如咁咁咁彈，但嗰啲係結他嘅技巧，好難彈！不過都係一啲啟發，所以今次係彈得最多變化嘅Bass Line。」

鍵琴手魚佬表示，出Live彈奏《生死時速》是「手速挑戰」：「電影感由弦樂帶出嚟，Live嘅時候好緊湊，String 、Organ、琴聲要轉聲轉得好快。編曲上避免太亂嘅關係，Strings同Organ會分番開，甚至去到最後一次Chorus cut晒所有Strings，用Organ墊底，令結他更加突出。」

除此以外，主音Van透露，能寫出如此歇斯底里的旋律，是受從少崇拜的搖滾巨星如Guns N' Roses，以及電影《Rock Star》影響，個個都拗晒腰飆高音。在旁的魚佬笑言：「有次Van出Show唱到拗晒腰整親，所以先嗌到咁大聲咁高音，直頭可以去賣鎮痛貼廣告，哈哈！」

想建構Nowhere Boys Universe！

Nowhere Boys以「電影式搖滾」為旗號闖樂壇三年，以往推出過三張EP，主音Van表示希望用一年時間籌備有10首歌的Concept Album，「時間、生命、選擇」是題材主軸；《Electronic Dreams》及《生死時速》也是圍繞這些主題，希望可以「發大去做」。

話明係「電影式搖滾」，又點會少得彩蛋呢！Van透露，從歌詞、旋律、MV人物或擺設，等等細節也有彩蛋，串連不同歌曲，他說：「Marvel有Marvel Universe，我哋都想有個Nowhere Boys Universe！」