【專訪】有轉變代表有生機　何韻詩：好怕大家話我犧牲咗好多

何韻詩，一個大家都不陌生的名字，由舞台走到街頭，都會找到她的足跡。這幾年的轉變與經歷，轉化為歌曲《極夜後》的訊息，留待大家細味。或許你也覺得，何韻詩仍在摸黑尋找出路，回望當年的「轉捩點」，她坦言：「我越嚟越怕大家講『你真係犧牲咗好多呀』，我諗我所謂嘅犧牲真係好細。」
攝影：黃國立

唔想俾人「大到」所以親自填《極夜後》

新歌《極夜後》是何韻詩首次負責填詞部份，對樂迷來說是一大驚喜，對她本人而言是突破了心理關口：「我份人唔大得㗎嘛！哈哈！但係Mike就『大我』點解唔填埋詞呢？始終相隔咁多年冇做專輯，都希望搵一啲新鮮感俾自己，由自己角度去講自已感覺更完整。」

她續說：「份詞好『我』，都未試過咁貼近我本人。雖然有啲歌迷話，好似冇一句鮮明嘅『金句』，因為我本身就唔係一個『金句ish』嘅人。但我又唔係好介意，金句就係好industry standard，我哋追求嘅係另一樣嘢。」

Mike Orange身為歌曲監製，兼令何韻詩執筆填詞的幕後推手，他又如何評價這份作品？他說：「做創作好多時，如果要追求industry standard係一個做法，但今次係想搵番多啲自己嘅真摯、由衷。有啲字脫離咗我哋某種平時喺歌詞見到嘅修辭，反而會更加入心，因為好直接地去寫，我都好期待下一份！」

大家太習慣搵「標準」，其實唔需要

大部份人聽歌都會有一個慣性，試圖解讀歌詞以找到最切合原作者心意的答案。不過，何韻詩與Mike都覺得，每一次創作，越能誘發到大家想像，才是創作的靈魂。何韻詩說：「可能呢個地方慣咗搵一件事嘅標準，其實係唔需要㗎，你(聽眾)覺得係咁就係咁樣。」

她續說：「有位朋友聽完後覺得，個感覺好似係追逐緊一樣嘢，雖然係未去到，但你知道係可以去到嘅；個答案係會有，只係未出現，呢個就係好精準地講到我哋想講嘅嘢。」

當容易嘅方法落咗閘，咁咪「揼石仔」囉

面對工作機會減少，演藝事業發展阻礙重重，不少樂迷都會替何韻詩擔心，到底點搵食呢？但她卻笑言：「我都好易養嘅其實，又唔使餐餐大魚大肉嘅。當好多容易嘅方法落咗閘，咁咪搵啲『揼石仔』嘅方法去做囉，都OK㗎！當然你唔會下下買幾棟樓，幾億幾億咁啦，但係基本生活係冇問題嘅！」

甚至有樂迷覺得她犧牲很大，不過她卻害怕了這說法：「我越嚟越怕大家講『你真係犧牲咗好多呀』，我諗我嗰個所謂嘅『犧牲』真係好細。」

旁人視此為「犧牲」，阿詩卻視為「生機」：「某程度上，對我嚟講係工作上另一個生機。如果冇發生咁多嘢，作為一個入行近20年嘅歌手，好易陷入一個舒適嘅狀態，習慣咗就唔會追求進步，因為好人好姐唔會想攞苦嚟辛。正正因為發生好多轉變嘅時候，令我一定要進化，冇得再用以前嗰套。」

「既然唔可以望番轉頭，唔可以原地踏步，咁咪向前行囉，呢個係我好感恩嘅地方。」