【專訪】BOP天堂鳥北上賺錢為追夢：有嚿錢先可以做廣東歌！

樂壇每年也有新血誕生，風潮一轉，舊有藝人可能已被遺忘。記得早幾年韓風仍是大勢所趨，快歌加跳舞彷彿成了歌手的代名詞，那些年，香港一口氣出了好幾隊跳舞組合，不論是男是女，受眾或讚或彈，風頭皆是一時無兩。蜜月期過去，這些組合又該何去何從？
2014至2015年，可說是BOP天堂鳥的蜜月期，由最初出道受網絡抨擊，再到後期改變歌路、形象，重獲好評，每次出活動也有不下過百粉絲到場支持。可惜其後與前經理人公司遇上合約糾紛，現時仍重新摸索著前路……
攝影：黃浩晉

舊公司力阻曝光　唱國語歌為助內地走埠

過去一段時間，雖然與舊公司的官司仍未完全解決，但BOP仍繼續做著自己堅持的音樂作品，既為糊口，亦不忘追夢：「舊公司一直用不同的方法，阻止客戶、傳媒、各平台跟我們合作。幸好期間得到不同朋友支持，才令我們可以繼續推出新作品。」早前推出國語作品《把你捧出手心裡》，BOP一改歌路，由強烈節拍變成暖心情歌，原來是為了攻入內地市場：「去到內地接騷，好多時候客戶都會要求你唱國語歌，所以打算做多一兩首去迎合佢哋嘅需求。」

今時今日歌手要糊口並不是易事，尤其BOP三子現時凡事也要靠自己，為了繼續追夢，也不得不面對現實：「大家都應該會知道，喺香港發展，其實收入同付出往往都唔成正比，所以我哋唯有去內地辛苦少少搵多啲錢，然後再返香港做屬於自己嘅音樂。其實直到而家，我哋最想都係做廣東歌，不過無論如何我哋都要切切實實有一嚿錢先可以去支持到自己嘅音樂事業。」

接受訪問當日，BOP更即席為歌曲《把你捧在手心裡》排舞。在歌曲MV當中也未能看到這個版本的舞蹈。

內地排場講究　勁多保安包圍似巨星

藝人到內地發展，不免也會感慨良多，尤其經歷過香港樂壇中的起跌，有比較之下，更容易理解為何全球的藝人也紛紛湧向北方發展，成員Tyrese（歐鎮源）表示：「喺香港做藝人，一樣可以賺到錢，但好視乎藝人當時嘅狀態係有冇作品、有冇宣傳、有冇新聞，從而決定客戶會唔會搵你出騷，因為香港市場唔算好大，但藝人有好多。而內地就比較簡單，可能我哋三個嘅形象係符合活動形象就OK。」Lincoln（許俊豪）補充：「始終內地嘅工作會多元化啲，可能一個晚宴或者好簡單嘅開幕都會邀請嘉賓，變相認識內地嘅agency都會易啲接洽工作。」

除了工作機會多，在內地出騷還有一種吸引力，讓不少藝人也從中得到滿足感，Gordon（葉灝基）解釋：「喺內地做嘢好得意，啲人就算唔識你都會走過嚟睇你、同你影相，好似巨星級待遇。不過其實好矛盾，因為佢哋唔認識你，但知你係明星，佢先過嚟影相，而喺我哋心目中，就當然希望粉絲們係真正認識你、喜歡你。所以喺內地要令人知道我哋係天堂鳥，其實係好難嘅事，如果做到嘅話都會有滿足感。」Lincoln再度補充：「同埋除咗觀眾之外，內地嘅工作人員都會令你覺得有種巨星規格。例如我哋落車會有好多保安包圍，即使你其實喺當地冇粉絲包圍住，佢哋都會令你好似一個歌手或者明星。」

Tyrese插嘴道：「其實都開心嘅，因為一返到上去（內地）就好似咩都唔使理，交通、食宿全部有人安排好。反觀香港，每當完騷落咗台轉個彎，我哋就去搭巴士，台上台下個身份係180度轉。雖然我哋追求嘅並唔係呢啲虛榮感，不過嗰份尊重始終都會令你覺得開心。」不過三子皆認同：「但無論如何，始終香港都係土生土長，有時都會懷念自己比較有名氣嘅時候，有啲Fans追車、搵你影相嘅日子。雖然眨下眼可以咩都唔同晒，大家都唔記得你，但係每次諗起以前台上唱歌，台下會大合唱、會大叫你個名，嗰份感覺同情懷都係最好。」

做群眾眼中的地底泥其實幸福

近年官司纏身，天堂鳥承認各方面也的確有阻滯：「做歌、派歌、接騷都會比以前難。加上近年香港的確少咗商場騷，以前電台每年都會搞好多活動，變相令我哋多啲宣傳，收入都會比較好。但而家少咗呢類途徑，惟有裝備好自己，所以我哋不停做歌，同時又會有自己嘅小生意去賺錢，從而支持我哋繼續追夢。」

在外人看來，天堂鳥的星運好像一直平平，由出道被負評，再到及後種種的事件，用「黑仔」來形容也不為過。但他們三人卻自言是幸福，Gordon說：「其實我哋嘅壓力係比其他人低，因為我哋一出道就已經喺谷底。」

啲人當你係地底泥嘅好處係：每次你再做好少少，啲人又會對你改觀。