【專訪】MC Jin當初要做Hip Hop Man唔容易：最大嘅hater係老竇
Hip Hop Man、立青哥、ABC等等名字任你如何稱呼，他就是他——MC Jin歐陽靖。
攝影：陳順禎
MC Jin去年參與《中國有嘻哈》，以金色面具人Hip Hop Man形象登場，貴為神級Rapper卻由零開始，從海選一步一步打入12強，即使沒有奪冠仍然獲得各界掌聲，人氣再次急升。MC Jin更以《I AM HIP HOP MAN》為題舉行內地巡唱，但當人人都只看到他現在成功的一面，又有幾多人知道他背後經歷過的辛酸？
回想起那段浮浮沉沉的時間，MC Jin話：「嗰陣唔好話有冇考慮放棄啦，其實……基本上放棄咗㗎喇！」雖然意志消沉過，但現在回望，MC Jin慶幸有呢段經歷，他更表示：「我嘅人生最精粹就係呢段時間！」
由BET《106 & Park》成為7屆台主，Freestyle 連續Rap贏多位黑人rapper開始，MC Jin聲名大噪，自然工作量與收入都直線上升。但年少氣盛是常識吧，MC Jin形容自己為：「我無論去邊，一行入去就有個款話俾人聽『冇錯！我就係最勁嗰個Rapper MC Jin！』」當時勢頭強勁自然受萬人敬仰，但到06、07年脫離唱片公司之後，MC Jin就深深體會到可謂「現實」。
雖然與唱片公司和平分手，但之後的落差實在並不是人人受得了，MC Jin憶述：「有公司嗰4年係順利嘅，搵好多錢，但搵幾多使幾多，有時仲會使凸；到冇公司之後，人氣同工作即刻跌，所謂嘅朋友同fans都好似唔認得你咁，真係知道咩叫現實。」
要維生就要為自己找出路，MC Jin試過整作Mixtape在網上銷售，豈料一句「喂Jin乜搞到咁嘅樣呀你？」又一盤冷水照頭淋。MC Jin形容當時心情很掙扎，但他認為：「除咗Rap範疇嘅嘢，我仲可以做到啲咩呢？」他又以快要熄滅的燭光形容當時對Hip Hop的堅持：「如果支蠟燭真係燒到冇，就真係要諗下係咪去Starbucks，宜家傢俬又好，正正經經搵份工呢？」
幸而當MC Jin捉襟見肘時又會有工作機會出現，雖然收入不多，也能足以維持生活，所以就更掙扎，他說：「唔好話有冇考慮放棄啦，其實基本上放棄咗㗎喇！Hip Hop、舞台呢啲嘢，我係放棄過，我覺得冇㗎喇，但係佢冇俾機會我去到撳掣呢個位。誇張啲講，我想放棄Hip Hop嗰陣，Hip Hop唔想放棄我！」
不過人生的劇情總是峰迴路轉，直到08年有人問MC Jin「有冇興趣喺香港出隻碟呀？」，往後才有大家認識的「ABC」、「立青哥」。MC Jin話：「其實我真係唔係好勁！但你問我係咪好努力？係。我係咪好珍惜？係。同埋我好熱愛呢樣嘢！」
「放開就是擁有」大家都聽過，但MC Jin對這句老生常談有很深感受：「係失而復得之後先有依家嘅心態，所以我點解會咁珍惜呢段Hard times。之後我可以點樣發展真係唔知，咁當然都希望係好啦！但就算聽日冇晒，我都會好舒服，就算大叫『Damn』都係一下。呢樣嘢真係幾多錢都買唔到，有時你愈捉得緊就愈辛苦。」
能夠達到MC Jin這種界境的確要有所歷練，可能正在讀這篇訪問的你都在經歷迷失方向的時間，MC Jin對大家說：「時間自然會幫你安排，但呢段期間你都要繼續爭取，繼續去行，只要機會一到個機會喺到，你ready for it，自然搞得掂。」MC Jin搞笑話：「由我玩Hip Hop開始，最大嘅hater就係我老竇，但係依家佢都好支持我，會覺得呢個文化好正，所以有啲嘢真係世事難料！哈哈！」
難得搵到MC Jin做訪問，又點止得咁少嘢傾呢！記得留意下一集，原來MC Jin都俾人鬧過「收皮啦！」，到底因咩事呢？