Encore兩次先肯完騷　吳浩康高呼：下次紅館見！

一連兩晚的吳浩康《Listen To Deep》演唱會經已完滿結束。演場會的入座情況以至現場氣氛超出預期，兩場爆滿之餘，在尾場為了滿足入場樂迷的需要，足足encore兩次才可正式落幕，不少現場觀眾大叫抵睇！而吳浩康更對舞台依依不捨，因為他等了這個機會三十多年了。

男主角吳浩康一開場便自彃自唱歌曲《火》、《感覺蘇豪》為在場的觀眾熱身。現場粉絲一點也不慢熱，從第一首歌開始便自動自覺為Deep打拍子。熱身過後Deep在台上表示「今晚啲歌如果簡得好嘅話，用你哋啲歡呼聲話俾我聽係簡啱咗」，接著唱出耳熟能詳的代表作《討厭》、《孩子王》、《棋王》、《擇日失戀》等。當歌迷聽到這些全場都識唱的作品，當然識做，馬上報以掌聲及歡呼聲。

今個演唱會有多個亮點，高潮不斷，而師姐Yumiko（鄭希兒）更連續兩晚為Deep當演唱嘉賓。當Yumiko唱她的手本名曲《相對濕度》時，不少觀眾也大為驚喜，全程企立歡呼。唱罷《相對濕度》後，此時Deep再次現身並大讚師姐是他一生人之中，其中一位最有義氣的圈中好友。而Yumiko馬上大讚Deep為人心地好:「大家知唔知佢（Deep）平時講嘢就大大聲好似好串，其實佢得把口，佢個人真係好善良」，接著又大叫「我哋下次送阿Deep上紅館！」全場觀眾馬上異口同聲吶喊說好。接著他們為大家帶來一系列跳唱Medley：活著viva／戒男／煞科／第五個現代化／點夠喉／大熱／越夜越有機／失憶週末／眼睛想旅行

來到演唱會尾聲，吳浩康唱出今年的主打歌《較早前錄影》時，他一度喜極而泣，並謂：「公司真係好錫我，佢哋成日同我講全公司都撐你，呢首係為我而做嘅年度之歌。」

來到encore部分，吳浩康先後唱出《洗剪吹》及《先入為主》並強調，這個部分是為睇足全場的填詞人黃偉文而唱，當然這兩首歌也是出自Wyman的手筆。結果Deep唱罷後，場館都開大燈了，但仍有約一半的樂迷依依不捨大叫encore，而Deep最後經經現人同意再次唱出《棋王》送給歌迷並以一句「我哋下次紅館見」結尾。

騷後吳浩康接受《香港01》訪問時，談到頭場獲老闆楊受成博士坐足全場支持，又曾在演唱中途攬住老闆的知遇之恩，Deep表示：「如果有喺我公司（英皇）做過嘅人都知道楊生（楊受成），佢係全公司最想幫我發展嘅一人，所以有一樣嘢我都想同大家講，喺我休息哩幾年有啲網友佢哋因為替我唔抵但又唔係咁了解公司情況下成日鬧英皇點點點，其實係大家嘅誤解。公司一直以來都對我好好。如果你話我呢幾年公司無咩幫我出作品等等嘅嘢，其實如果亂出作品咁樣唔係代表幫我，咁樣反而害咗我，所以有好多時都唔可以咁諗。講真，係我人生入面楊生陪我過咗好多難關，咁多年來我搵佢通常都冇乜好事，反而每次搵佢都係要佢幫手，而佢永遠都唔會托手踭。」

他續說：「其實公司真係好錫我為我做過好多嘢，不過出面人唔會知。好似我媽咪走咗（病逝），我公司冇出聲就幫我做咗好多嘢，只不過哩啲係我嘅私事，所以我好少去同大家講，我屋企有任何事，公司實際行動又有，慰問關心都有。當年我無得出唱片又會搵電影俾我去拍，我覺得有一間咁好嘅公司咁對我真係夫復可求。」

 談到Deep在台上熱淚盈眶表示自己過去曾走遠了，所以咁多年一直渴望得到台上一分鐘的機會，Deep表示：「我咁多年去不斷堅持，努力，都只係想做一個合格嘅仔，我想做一個似樣嘅人。我想我老豆可以見到我再上舞台。我爸爸就係一切令我努力嘅原因。喺我媽走嘅時候，我知道所有嘅愛唔係理所當然，身邊嘅一切唔會永遠留喺身邊，所以我會珍惜眼前人。每一日我都覺得時間唔夠，所以我每一日都要加快腳步，正正就係咁行下行下終於可以再次上舞台。」

提到他在完騷時大叫紅館見，Deep坦言這是他的目標：「對於我個人嚟講，紅館係我嘅目標。但係確實消息未有，依家咩都未定，但係我每日都會做好準備，我好希望下次再上台就係紅館舞台。」