吳浩康開騷入座率逾9成　「等咗30年就係要做歌星企喺台上唱！」

吳浩康入行近15年，今晚終於首次舉行個人大型個唱《Listen To Deep》，樂迷與阿Deep也總算是守得雲開。今次在九展開騷，早幾日阿Deep在社交平台上吐苦水，表示今晚頭場幫了不少人留飛，怎料開騷在即，卻集體放飛機，最後共310張門票在阿Deep手上，分分鐘要自貼十幾萬！

幸好今晚演唱會於8點半正式開場，現場目測所見，入座率也有9成以上。原來阿Deep在社交平台訴說事件後，經網民通力合作下，已把門票幾張幾張的慢慢全數散去。阿Deep也總算可以放下心頭大石，全程投入演出。

甫出場，阿Deep站在高台上先把弄一下手上結他，一齊準備就緒後，首先唱出《火》、《感覺蘇豪》釋放一下，讓自己熟習舞台上的感覺。緊接下來便要見真章，在小提琴手及一眾弦樂隊伴奏下，唱出《討厭》、《孩子王》及《棋王》等代表作，雖然過程中可能因緊張而唱錯幾句歌詞，不過滿頭大汗的阿Deep也一一克服發台瘟情況，在觀眾的掌聲鼓勵下，開始進入狀態。連台下觀眾也不禁道：「阿Deep啲歌真係好難唱！」

連續幾首名曲後，阿Deep先回一回氣再說：「我今年34歲，我等呢一日等咗34年，可唔可以俾多啲掌聲我？由細到大，我心入面都只係得一個目標，唔係要做歌手，而係要做歌星。做歌手喺邊度唱都得，歌星一定要喺個台度唱！所以無論我花幾多時間，幾多心力都一定要企返喺個台度，多謝你哋帶我上嚟呢度！」全場一遍掌聲後，他續道：「有人話『阿Deep如果你生性啲，10年前已經開咗啦！』但我覺得每個人有唔同嘅成長，我唔知宜家呢個係咪最好嘅timing，不過我知道宜家發生緊嘅事就係最好嘅事。冇咩好抱怨呀，如果我等十幾年廿年甚至三十年，可以等到你哋，我仲有咩好怨，係咪？」台上的談吐，讓樂迷感覺到阿Deep的成長。抖夠氣，他再唱出《第三者》、《浪漫時代》、《擇日失戀》，一次過滿足樂迷多年來的願望。