側田紅館頭場聲沙沙唱《好人》　「人人親近我」再聽一樣有Feel

大大話話原來側田自從2015年後，已經2年時間冇喺香港開演唱會。平時電視節目就見得多，今晚《側田Chapter Free演唱會2017》香港站終於喺紅館舉行，與香港樂迷近距離接觸。今次演唱會採用鑽石形舞台，讓樂隊成員一起坐在台上演出，相當氣派。大概晚上8點35分，全場近呼滿座，側田以一身紅色Bling Bling長袍出場，並唱出第一張專輯《Justin》內的代表作《我有今日》及《好人》，「I'm alone, I'm alone」。事隔12年，雖然側田在演繹上有所改變，減少了自卑及孤僻感，但他的音色依然中音甜高音準，令香港樂迷回憶都返晒嚟！

聽側田演唱會，最佩服是樂迷的反應及歌曲的熟悉程度。當側田唱k房必點歌之一《三十日》時，隨便在副歌空出兩句，全場歌迷也能即時接上，就似每位也在開騷前先到K房溫習完一輪。緊接唱出《Kong》，側田更走到台邊與樂迷握手，令樂迷放聲尖叫。側田在台上清一清喉嚨時表示：「死啦，唱咗幾首已經有啲沙聲，今晚仲有成三十首要唱，睇嚟今晚首首都要全場大合唱。」兩年半沒見香港歌迷的他感慨表示：「每次開騷我都好似搞結婚咁。深信大家工作都忙，依家約個朋友食飯都好難，一年見得一次。所以我開演唱會就好似有個機會畀大家聚會咁。」他更邀請了他的三叔Ted Lo到台上為他伴奏２首英文歌《Lately》及《It might be you》送給樂迷，樂迷以掌聲感謝Ted Lo。

為了今次演唱會，側田特意找來填詞人陳詠謙為他的作品《矛盾一生》重新寫詞，讓他以舊曲新詞演唱《矛盾一生》：「哩首歌本來係女仔唱比男仔聽嘅，我叫陳詠謙填返一個男仔嘅版本，佢填詞嘅時候同我講個idea，我話首歌好似講緊『逼婚』，佢話其實唔係講『逼婚』，我就同返佢講，我意思係英文嗰個『Big Fun』，希望大家都會鐘意呢個版本。」

聽咗一輪慢歌，當然要聽吓快歌。其實側田當年有唔少快歌一樣係ｋ房熱門之選，包括《決戰二世祖》及《Volar》。「Hey Mr. DJ 要播爆這天地」隨著女Dancers的熱舞下，感覺現場樂迷也回到當年在clubbing舞池上活躍的日子，氣氛high爆！