林奕匡開騷吹色士風玩改編歌　林一峰：爵士對我嚟講就好似釀酒咁

林一峰與林奕匡昨晚於九展舉行《Mr. Nice Guys》演唱會，兩位治癒系男歌手首次同台演出，除了獨唱自己的作品，也有crossover互唱對方的作品。林奕匡更騷quali吹saxophone，一峰大放笑彈話：「今晚我哋互相幫大家吹下嘢！哈哈！」引得觀眾哄堂大笑。一峰與阿Phil靚聲不用多介紹，又肯作新嘗試為樂迷帶來驚喜，一口氣將《Good Man》、《一支煙的時間》、《我和你》等歌曲改編帶點Jazz味道，充滿律動感的版本，令人感覺置身懷舊的酒吧之中，放鬆Chill一晚。

兩人又即興唱出一些旋律與觀眾互動，台上台下都非常投入氣氛之中。林奕匡演奏saxophone，林一峰吹口琴令各自的歌曲變得更豐富，加上二人以紳士造型登場，令觀眾聽覺、視覺都充滿享受。正當觀眾都陶醉在音樂之中，豈料一峰講一句：「我哋互相幫大家吹下嘢！哈哈！」大家被殺一個措手不及，忍不住大笑，真係估你唔到。去到演唱會尾聲，一峰與阿Phil合唱《高山低谷》、《回到花開的那天》，最後以《The Best Is Yet To Come》作結劃上完美的句號，兩人興奮攬攬，阿Phil更抱起一峰自轉。

二人完騷後接受訪問時，被問到今次演唱會將部份作品改成Jazz玩得過癮，之後會否以此為主題創作專輯？兩人聞言立刻話：「嘩！好大工程呀！」阿Phil話：「可以考慮嘅，不過一步一步嚟，隨住人生改變，到再成熟啲嘅時候可以試下嘅。」一峰就話：「爵士對我嚟講就好似釀酒咁，我覺得我呢支酒只係釀咗40年，未得住，但係我會繼續釀落去。今次遇到阿Phil，大家嘅火花就可以催化呢件事。」

阿Phil補充話：「今次喺台上面玩音樂係一次性，所以會大膽啲。其實我都熟悉Jazz，但無可奈何廣東歌做Jazz比較難，空間較細；所以未必會成隻碟咁做，可能一、首兩歌，或者改編幾首都得嘅。」

那今次為演唱會改編幾首耳熟能詳的歌曲會否很高難度，還是歌曲本身已留有很大發揮空間？一峰表示：「有位前輩講過，一首寫得好嘅旋律可以被演繹嘅空間好多，全新創作又得，從中提煉一啲Jazz嘅精神又得，不過最緊要都係空間感。」