【專訪】鄧月平轉做歌手　未搣甩「巨胸翠如」：鬼叫自己唔紅咩

鄧月平在普遍觀眾心目中第一個印象就是「巨胸翠如」，由入行前到參與選美節目，再到參與電影拍攝，她的身材一直都成為焦點。雖然鄧月平在幕前的形象深入民心，但她卻以「年尾壓軸新人」的姿態進軍樂壇。入行一年就作多方面嘗試，是否為了搣甩花名？

對於「巨胸翠如」四個字，鄧月平視之為動力：「證明一日未改名，鄧月平你一日都要努力啲，改完名之後要更加努力！如果唔係你會變番『巨胸翠如』呀！」

攝影：陳順禎

以「男友視角」認識一下鄧月平(陳順禎攝)

何事「踩過界」由演員變歌手？

可能有人會好奇，為何鄧月平好端端會加入樂壇？原來她對音樂的興趣早在中學開始。鄧月平表示：「中學試過走去busking，本身係搲歌唱，後來就變成長駐。」初加入公司時，鄧月平都試過向公司提到可以幫手寫Demo，到今日終於有自己歌，她多謝公司送她一份禮物，亦感激身邊有很多前輩提攜。

《女神經》原來係「女神兵」？

鄧月平是不少男士的女神，何以會出歌話自己是「女神經」？鄧月平笑說：「公司覺得我個形象好似『女神經』，好似精神分裂咁，想法成日飛嚟飛去，哈哈！」聽到這句身旁經理人面有難色苦笑。傻笑一輪鄧月平忽然一本正經說：「其實首歌係講每一個女仔都係女神經，而MV入面就用甜品去比喻女仔尋找愛情嘅過程，嘗試各種味道去尋找合適自己的愛情。」咁快轉到channel果然係「女神經」！

不過唔講唔知，原來鄧月平都試過「當兵」，更將經歷放進歌詞，她提到：「其實歌詞暗藏自己一段少女心事嘅經歷，我中學時候體育好勁有個花名叫『馬騮』，但係為咗一個迎合暗戀嘅男仔就刻意做到好文靜，但最後都係俾人friend zone埋。所以歌詞入面『誰來真心喜愛我　通知我　不要拖』同『專心把我　研究得清楚』係我嘅心聲，希望對方唔好玩泥沙。」

「冇一個女仔鍾意俾人標籤」

今時今日「視覺影響聽覺」、「用眼球聽歌」是常識吧，加上鄧月平有被外界稱作「巨胸翠如」，她會否擔心過大眾只留意她的身材而蓋過她的努力？鄧月平豁達說：「所以我就努力做戲，努力唱歌令大家覺得我唔係『巨胸翠如』。」她又笑言：「鬼叫自己唔紅咩，紅啲人哋咪唔會咁講囉，哈哈！」

雖然鄧月平經常嘻嘻哈哈，但她也有一聲心底話：「冇一個女仔希望俾人標籤，無論靚女又好，平凡又好；身材突出又好，身材唔好又好；都唔希望俾人標籤。」即使外界很多談論聲音，但鄧月平也樂觀面對：「證明一日未改名，鄧月平你一日都要努力啲，改完名之後要更加努力！如果唔係你會變番『巨胸翠如』呀！」

做「年尾壓軸新人」壓力大？

鄧月平年尾才派歌做新人，會否因為要出成績而給予自己很大壓力？她卻自嘲：「我不嬲都冇乜攞獎運，自己努力咗先啦！哈哈！」不過她透露原來錄音時候才是最大壓力：「當時前後錄咗十幾個鐘，加上填詞人好勁，唔想整臭人哋個名所以迫自己要唱到最好，嗰陣仲錄到喊！」幸好身邊的工作人員對鄧月平照顧有加，除了安撫她的情緒，監製更逐句向她解釋歌詞，如何控制聲線，最後《女神經》才能面世。

場地提供：White Button Cafe & Dessert

鄧月平係「女神經」？你又點睇先？(陳順禎攝)