C AllStar鄭秀文紅館尾場玩到唔捨得走　Sammi變花痴：On仔好硬！

《生於C AllStar》演唱會昨晚完美結幕，隨著演唱會的結束亦為C AllStar的八年音樂生涯畫上休止符。演唱會在完成《CantoPopsibility》的部分後，便進入後半環節。舞台佈景一轉，LED牆上顯示出維港景色，不同的演員在舞台上出現，扮作維港旁的人群，忽爾讓人想起，C AllStar在剛成立時亦曾在街上進行一系列Busking活動。身穿西裝再次上台的四人，唱出《夜幕天星》、《時間囊》、《燕尾蝶》、《別讓小島沉沒》、《城徨城恐》、《門常關》、《約定》、《日暮途遠》等歌曲，表面上歌曲似乎有點不按理出牌，但實際上卻相當有深意。每首歌曲的內容也像訴說出對香港這城市的關愛及痛心。

演唱會前已高調宣佈休團的C AllStar，四人今次為演唱會特地分別拍攝了一段「休團宣言」的短片，把各個成員的心聲紀錄下來。On仔笑言：「希望單飛後，幾位兄弟不要再於Whatsapp上已讀不回，還要讓我發現你們在線上。不過我唔會嬲你哋，我仲會@到你哋覆我為止。」釗鋒則以不同的動物來形容一眾兄弟：「On仔？成隻猩猩咁囉。阿King就係樹獺，慢活一點，佢成日都唔喺我哋呢個空間度。Jase…都係猩猩囉，多毛呀嘛，佢身上嘅毛髮係可以修飾一對手，大家嗌佢一聲毛毛呀。」而阿King的片段中，則比平時更活躍一點：「On仔，你係C AllStar嘅太陽，你充滿正能量，你每次散播正能量嘅時候，啲肌肉就會越嚟越大。《天梯》七年啦，釗鋒七年啦，咁你係咪應該整多首《天梯2.0》啦？Jase，我想聽你唱歌多過你介紹嘢食囉，大家話係咪？」片段隨即轉去Jase的畫面，播出他介紹食物的場景：「有時你要試啲新嘢呢，但係會發覺，嘩洗唔洗咁鹹呀？你試下好似我咁，擺低十分鐘唔好掂佢，之後再食返呢，你又會發覺好味好多喎，點解呢？係因為時間會沖淡一切，其實人生都一樣。」隨即引來全場掌聲及笑聲，原來Jase在冷面底下亦藏著一位笑匠。

四子再次出現在舞台上，並唱出《專業失戀30年》及《犯賤》的合唱團版，及後唱到《最後一次》時，Sammi鄭秀文突然在台上出現，並與四人合唱這首屬於她的作品。與四人聊天時，Sammi顯得特別興奮：「今日綵排嘅時間，一嚟我就梗係抽下水先啦，一摸落去On仔度，好硬呀！佢嗰六舊腹肌真係好似石頭咁硬！」On仔隨即脫掉上衣表示：「你想要我送比你啦。」而釗鋒在旁也不禁多口：「比起C AllStar嘅On仔，同你屋企嘅安哥呢，邊個硬啲呢？」隨即被其餘三子及Sammi揶揄他亂講嘢，不過Sammi亦大方回應：「摸落去又真係On仔硬好多囉。」

Sammi亦問到四人：「聽講你哋今晚之後就休團，其實咩叫休團？」C AllStar亦費了一番唇舌去解釋：「即係我哋C AllStar會暫停用團體名義去做音樂，可能去吓旅行先。」Sammi立刻插咀：「休息只為走更長嘅路，係咪咁嘅意思？」四子亦表示贊同，Sammi續道：「你哋今晚揀《最後一次》同我合唱真係好有意思，同埋我好想比啲鼓勵，因為我覺得一個團體經歷咗咁多嘢，去到七年要暫休，走出呢個Comfort Zone係好需要勇氣，對於你哋四個都係新開始。可能歌迷未必知道，其實佢哋呢份勇氣好大部份都係嚟自你哋呢班歌迷。希望佢哋有咩個別發展都好，大家都要繼續支持佢哋。」