李克勤入行30年仍想追夢　黃偉文：四大天王應該改做五大

李克勤《慶祝成立30周年》演唱會昨晚紅館舉行頭場，慶祝克勤入行30周年，當然有重量級嘉賓撐場，鄭秀文（Sammi）以全身淡藍色「波子汽水Look」登場，更唱出《終身美麗》送給克勤及太太。克勤於台上表示，自己開過100場紅館騷都未試過碰到舞台未能預期搭好，導致未能完整地綵排的問題，不過他在台上自信表示：「台上呢個歌手好有經驗，30年喎！冇排過都有個譜嘅，大家估唔到先好玩㗎嘛！」

除了重量級嘉賓，克勤於演唱會作出多樣突破，又吊威也又有連場勁舞；克勤亦非常感性講到上年「轉會」一事：「我作出咗人生一個非常之大嘅決定，一個同我並肩作戰咗30年嘅團隊，我離開咗佢哋，呢個係非常難做嘅決定，係包含咗好多唔捨得、好多眼淚、好多團隊嘅情義、好多無言感激！」

克勤繼續有感而發：「我覺得人生喺唔同嘅階段係應該去追尋夢想，同埋接受挑戰！我想同在座好多同我差唔多年紀嘅朋友講，乜嘢年紀都好，都應該追尋自己嘅夢想，因為如果你冇夢想，你就係一條粉腸！自己諗吓！」此話一出隨即全場掌聲歡呼聲四起。

演唱會間場播出克勤圈中好友為他打氣的片段，有劉德華、周慧敏、鄭秀文、黃偉文等等，黃偉文更用「勤」字搞gag：「有啲人會咩口咩面，你可以叫佢做『西勤』！」不過之後黃偉文正經起來，稱讚克勤應該是香港樂壇的天王之一，當年改「四大天王」人應該改「五、六大天王」。

因舞台搭建問題，開騷前克勤未能完整綵排，正式開騷時見他多次用手勢與音樂總監何秉舜溝通；幸好克勤與現場樂隊都是有經驗的音樂人，整個演出順利。與新團隊首次合作，而且未曾綵排都能演出順利，難怪克勤在台上不時流露出滿意的笑容。Enore部份克勤唱出《月半小夜曲》、《我不會唱歌》、《紙牌屋》、《愛不釋手》等經典金曲，紅館騷頭場於晚上11時30分圓滿結束。

到後台接受訪問時，克勤提到前晚打點一切後凌晨五時才回家兼且失眠，昨日早上又要應付綵排，的確搏到盡。雖然辛苦，但克勤都仲識講笑，講到吊威也：「第一次俾人吊高囉！個感覺係爽嘅！我排嗰時係咁轉到嘔呀！」克勤又講到演唱會途中突然聲沙，是因為抽筋所致，不過仍然堅持是為了證明：「幾十歲都仲可以有進步空間」！