Celine唱情歌原來無得揀 攞Golden Buzzer有壓力：但唔係好多囉
年紀小小就揚威國際9歲「小巨肺」Celine妹妹譚芷昀，早前她在美國節目《全美一叮》（America’s Got Talent）中，一鳴驚人，並在最新一集，以Michael Bolton的《How Am I Supposed to Live Without You》獲評判按下「Golden Buzzer」直送到「Live Show」，成為首位港人獲此殊榮。
眼見Celine妹妹為港人爭光，其經理人蕭定一（阿一）今日就在銅鑼灣為她舉行見面祝捷會。Celine妹妹在蕭定一陪同下以花花連身裙配高跟鞋出場。不過她的爸爸譚順生因為工作為由，未有出席活動。
見到Celine妹妹接受訪問嘅時候，大方得體又不失童真，係幾可愛嘅！
Celine妹妹拎「Golden Buzzer」蕭定一：無寄望過
見面會結束後，Celine妹妹在經理人蕭定一陪同下接受傳媒訪問，Celine妹妹對於今次在《全美一叮》中 ，獲評判按下「Golden Buzzer」感到非常開心：「我覺得好開心啦，屋企人都有恭喜我，但未有celebrate（慶祝）。」至於問到會唔會叫爸爸送禮物，Celine就話無不過已經好開心。阿一補充：「佢第一round無攞到Golden Buzzer，所以去到次圈嘅時候真係無諗過可以拎到，因為通常都係第一round會易攞Golden Buzzer，因為第二round只有客席評判先會有Golden Buzzer嘅權利，所以要第二round有機會相對會好低，仲要每晚只可以得一個，所以我哋都無寄望過。」Celine續說：「如果可以繼續晉級就好，不過我依家已經好開心。壓力都有少少，但唔係好多囉。」
到蕭定一早前接受《香港01》訪問時表示有意為Celine申辦紅館，蕭定一表示：「其實當時簽佢（Celine）嘅時候佢已經有呢個夢想，我諗所有歌星都會好希望喺紅館開演唱會，咁大家都知道要申請紅館真係好難，要早一年申請仲要未必批畀你，依家睇下有無啲積極啲嘅方法可以早啲開到紅館，概念都係想做慈善，而唔係想賺錢，想畀多啲人知道Celine拎到呢個殊榮之餘，同步畀人知道佢唱歌嘅實力，同埋幫助到有需要嘅人。」問到如果可以開紅館，Celine會唔會同爸爸（譚順生）合唱，Celine也表示想與爸爸合唱。
講到嚟緊比賽歌曲選擇方面，蕭定一表示其實揀歌源自大會：「賽制其實係參賽者可以提議想唱咩歌，而大會會補充一啲佢哋嘅意見，例如係，我哋揀咗十首歌，佢哋會減走五首，再畀多五首佢哋揀嘅畀我哋，而呢十首歌係要到最後比賽前兩三日先知道係真係唱邊隻嘅。好似啱啱參賽呢首《How Am I Supposed to Live Without You》就係大會所提議俾我哋唱。所以，如果可以俾我哋揀我哋都唔會揀呢首歌囉老老實實，因為呢首係一首情歌，我哋都明白對佢嚟講唱一首情歌係好唔着數，但可能佢哋（大會）有佢哋考慮嘅嘢啦。」
問到Celine知唔知道《How Am I Supposed to Live Without You》有咩意思，Celine似乎用咗另一個方式去代入呢首歌：「爸爸同我講，係講我同我妹妹..」阿一馬上聲音護航：「佢係代入咗親情，我覺得呢個做法係啱嘅，起碼同妹妹嘅感情一定有，始終經歷唔到《How Am I Supposed to Live Without You》嗰種失去，佢同妹妹日日都喺到開開心心，所以唔會有失去感。」
Celine妹妹被點評唱歌無感情
談到音樂監製Eric Kwok（郭偉亮）曾經點評Celine妹妹唱功了得但情感不足，阿一神回：「我明白佢哋嘅意見，其實我自己都有咁嘅睇法，睇法係一致，但係個問題係；第一，歌我哋無得揀，我哋只可以喺範圍入面做到最好；第二係，一個9歲嘅小朋友，如果將失戀嘅感覺唱到淋漓盡致，我相信佢父母都會好擔心，但我當然係會聽Eric嘅意見啦，喺感情上我哋會盡量落多啲功夫去解釋畀佢聽，希望佢下次可以明白多好多。」