【任噏樂評】譚順生「忍痛」低調為愛女賺人氣　轉技倆係乜套路？

有「小巨肺」之稱的Celine妹妹譚芷昀年僅9歲，早前憑Celine Dion名曲《My Heart Will Go On》於真人騷《全美一叮》一炮而紅。在最新一集，Celine妹妹暫時放下Celine Dion，改唱Michael Bolton的《How Am I Supposed to Live Without You》獲評判按下「Golden Buzzer」，更是首位港人獲此殊榮。Celine妹妹所屬公司的老闆蕭定一更表示希望為她舉辦紅館騷。

雖然Celine妹妹成績驕人，可謂「英雄出少年」，但外界對其父譚順生的批評不絕，家燕姐更斥「此人居心叵測」。譚順生被爆出涉嫌學歷造假、網站得獎紀錄「坐時光機」、搶家燕姐學生、硬屈《中國好聲音》港區冠軍為自己學生作招來、有傳父憑女貴「綑綁式」一併簽約蕭定一旗下、唱功被質疑是否值收一萬蚊四堂等等。

連串事件爆出後，譚順生忽然轉玩低調潛水成個幾月，未知是否覺得自己之前樹大招風要收儉一下。都啱嘅，其實每人都可以有改過嘅機會。點知轉個頭，佢星期一預告女兒會再次現身《全美一叮》，星期二出席活動又唔接受傳媒訪問，到今日Celine獲評判按下「Golden Buzzer」片段喺網絡瘋傳，再次備受關注。到底譚順生係真心轉低調，定係另一個宣傳套路？

譚順生之所以會讓人猜測是否「真心低調」，皆因佢都係生意人，所開辦嘅音樂學校亦甚具規模，相信佢都知曉呢個市場嘅遊戲規則同觀眾嘅口味。而且討論區，網民嘅言論嘅反應一向都係「逢紅必反，逢黑必捧」。之前太過高調，被爆出黑材料，導致網民一致負評，正正中咗「逢紅必反」；相反，近日低調處事，沒有過度曝光，網民目光集中在Celine再奪佳績上。雖然偶有暗諷譚順生嘅留言，但都只係抽下水，而非以往負評洶湧喪插。話唔定可以乘機洗底呢？

話說回來，睇番Celine獲「Golden Buzzer」條片，譚順生喺觀眾席支持囡囡時笑得好甜，都睇得佢係真心錫個女嘅。既然Celine有天份當然要栽培啦，讓女兒出國比賽吸收經驗亦無可厚非，但時機與手法就係問題，所以外界先會批評佢「視女兒為搖錢樹」。

再講，譚順生有開辦歌唱學校，將女兒視作生招牌亦理所當然，話晒系出自己名門，宣傳下都唔過份。但Celine只得9歲經常四周演出，每日刻苦練習，為保靚聲戒零食，就好似冇咗童年一樣。可能有人會話「子非魚焉知魚之樂」，話唔定Celine妹妹享受四出表演呢？話雖如此，但人生有好多面向，童年應該無憂無慮探索嘅黃金時間，如果只側重於歌唱，實在太單一。況且，已故天后梅豔芳曾表示，回想自己童年只顧忙着表演亦有所遺憾。

所以，無論譚順生係真心低調，定係轉另一種宣傳套路都好，希望佢可以多啲照顧番Celine嘅感受。有時過份將長輩嘅期望加諸下一代身上，分分鐘會弄巧反拙，製造無法修補嘅裂痕。