【一首歌】盧冠廷《陪着你走》最感動情歌 「一生一世也不分」
撰文：黃浩晉
出版：更新：
前排大台播《不懂撒嬌的女人》嗰陣，係咁播《陪着你走》，劇中王浩信自彈自唱又有，譚嘉儀唱嘅插曲版本又有，原來仲推出咗王、譚二人合唱版，搞到成個腦都係「陪着你走 一生一世也不分」，明明好冧都搞到好似有啲甜得滯。
雖然話甜得滯，但係《陪着你走》呢首歌真係好經典，傳唱度極高，不少歌手都翻唱過，就連原唱盧冠廷自己玩都有幾個版本。由原版到一支木結他柔情演繹版，到近期專輯《Beyond Imagination》入面一個少少Jazz味嘅版本，各自有值得細味之處，唯一不變的就是曲中浪漫、溫馨之情。
盧冠廷與太太在一次訪問中提及，原來呢首咁sweet嘅歌原來係因為一次爭執而誕生！真係估你唔到！當時盧冠廷與太太嗌完交，寫咗首新歌放喺枱，第二朝一起身就發現太太填好晒歌詞。啲詞咁冧，緊係咩氣都消晒啦！
「如果 走到這世界邊端/我倆已是無力前行/跟我一起飛去/一世伴你同路去」
咁多個版本你最鍾意邊個？