【每逢大事講故事】《射鵰》G7版　大國領袖演活了金庸小說角色﹗

近排全城街頭巷尾個個都在射鵰射鵰射鵰，唔好心邪，飛雲講緊套劇啫。翻拍過n咁多次，劇情全世界都識背，仲有咩新嘢講？「李一桐好可愛，朱茵最靚，周迅最神似，不過黃蓉都係翁美玲做最好」、「新郭靖麻麻地，都係黃日華版最經典，Chilam也不錯」、「穆念慈孟子義好靚女呀」、「苗僑偉演東邪型到爆裂」……
講呢啲，飛雲自然係搭唔上嘴嘅，識睇劇梗係要睇配角，《射鵰》入面，最好睇其實係東邪西毒南帝北丐神通五絕，雖然好少出招，但話說佢哋個個擁有絕世好武功，咁多年嚟睇咗八個版本，好似無乜邊次會對飾演佢哋嘅演員有深刻印象。計我話，如果又再翻拍多次呢，五絕人選其實早已在國際舞台出現，大家不妨一齊嚟研究下佢哋做邊個角色最啱啦！

上個禮拜個G7峰會，成個華山論劍咁，各國領袖各懐鬼胎，尤其是侵侵呢個美國新任大統領，專唱反調，人講東佢去西，成日匿埋日練夜練一身「Make Amercia Great Again」毒門武功，收埋收埋死都唔肯益人，簡直同「老毒物」西毒歐陽鋒如出一轍。

根據金庸原著，歐陽鋒乃西域人士，身材高大，高鼻深目，臉鬚棕黃，目光如電，語聲鏗鏗似金屬之音，應為歐洲白人血統。此人兇狠毒辣，為求奪得「武功天下第一」的名號不擇手段，嘩，仲唔係為侵侵度身定造？

無論對住任何人，佢都係喺度搧風點火，同歐盟委員會主席容克（Jean-Claude Juncker）開會，即刻打小報告唱衰德國人，「德國人真係衰，極之衰，睇下佢哋在美國賣緊幾千萬部車，唔得，我哋一定要阻止！」之後仲響Twitter出埋帖文再公開鬧多次。

▲退出《巴黎協定》，網民睇不過眼，幫佢改圖。由於飛雲見到粗口會打冷震，於是幅圖係經過特別處理。最抵死都係右面那句，「我都快死了﹗」，串侵侵不理他人死活。

之後到正場G7峰會，六國領袖個個叫侵侵支持《巴黎協定》，佢一於睬你都傻。大合照果陣繼續眾人皆醉佢獨「醒」，一個可步行的距離，佢偏要坐高爾夫球車過去。全世界等佢一個，無嘢嘅咪又俾人喪改圖囉。

相關文章：遲到、推人、唔合群　特朗普玩轉G7峰會

▲「G7領袖在照顧小侵侵」

侵侵最令人羨慕之處，也許是其貌不揚卻娶得大美人梅拉尼婭當妻子，這名第一夫人不時缺席白宮活動，出席時不是心不在焉就黑面，甚至公然對侵侵的熱情一手撥開，令網民總是幻想自己可以英雄救美，弄了個「救救梅拉尼婭」（Save Melania）Hashtag出來，唉，歐陽峰的獨門武功，咁啱咪就係叫做蛤蟆功囉，侵侵如果唔識，又點會食到天鵝肉丫。

相關文章：「#放開梅拉尼婭」網上掀熱潮　史上首個需「營救」的第一夫人？

北丐洪七公係男人，仲要係乞丐，點解會配落默克爾度？咪唓住先，嗱，德國本身當然有錢啦，但作為歐盟老大，佢要照顧希臘、葡萄牙、保加利亞、羅馬尼亞等等債台高築嘅兄弟，排緊隊入嚟嘅仲有馬其頓、科索沃、摩爾多厄、烏克蘭呢堆伸手派，丐幫出名兄弟多，歐盟亦一樣，而且都係窮鬼為主，單係背景已經好似。

而且身為丐幫幫主的洪七公，為人充滿正義感，鋤強扶弱擁有俠義精神，與力主拯救中東難民的默克爾倒模一樣。最重要一點，洪七公同西毒係死對頭。默克爾亦然，侵侵在G7峰會拒絕為《巴黎協定》作任何承諾，激到一向談吐得體嘅佢都忍唔住爆Seed：「過去幾日嘅經歷話我知，那個可以依靠別人嘅年代已經過去。我們歐洲人必須親手掌握自己的命運。」變返做人話咪就係明串侵侵同美國靠唔住，佢哋要從此靠自己。

擺明車馬同美國劃清界線，甚至連英國也躺槍：「當然啦，我們會同美國呀、英國呀維持友誼，不過我們亦會同其他國家好似俄羅斯咁保持友好關係囉。」明明前幾日仲係盟友，共處幾日就由in a relationship連跌十級變成普通朋友？好彩仲未由「普通朋友」降級變「人哋」，但都足見侵侵同人反枱嘅功力實在深不見底。

相關文章：G7峰會團結幻象　默克爾：特朗普靠不住　歐洲人要靠自己

最吊詭的是，射雕結局係洪七公同歐陽鋒攬住一齊死，現實版入面默克爾一副同侵侵力戰到底格局，會唔會有類似下場真係要繼續追落去先知咯。

頭先講到，默克爾鬧美國時燒埋英國果疊，首相May姐到底衰咩呢？侵侵唔肯在氣候協議就範，英國作為美國頭號盟友，默克爾心諗：你點都要走出來同隻侵侵痛陳利弊曉以大義啦，不過以默克爾連英國都打埋落「普通朋友」呢一類別嚟睇，May姐明顯係無咁做到，先激到北丐Angela扎扎跳。

好明顯，氣候協議呢啲遙不可及嘅嘢，May姐呢一刻真係唔理得咁多，大選迫在眉睫都算，Brexit果下先慘，成班男人搞咁大嚿蘇州屎出嚟，佢完全唔知點收科。所有事不關己嘅嘢是是但但求求其其咪算囉，英國一Brexit就同斷六親無分別，叫May姐做出咗家嘅南帝段智興就啱晒。

講開又講，Brexit之後無晒朋友，可能會好得閒，May姐或者可以學香港果個May姐咁，上電視教人煮吓餸，反正屋企收埋大堆Cook Book同家傳秘方無用武之地，話唔定仲可以闖出條新血路呢。

深度閱讀：【英國脫歐】談判路漫長　首相文翠珊提前大選　勢一箭雙鵰挫工黨

東邪黃藥師永遠最難搵人演，自成一派上乘武功不在講，而且上至天文、下至地理，琴棋書畫、無一不曉，在金庸大師筆下「正中帶有七分邪，邪中帶有三分正」，試問人世間邊有一個咁嘅人？新版射鵰識搵苗僑偉來做的確型到裂，其實有一個人會更加神似，佢就係俄羅斯總統普京。

前KGB出身的普京神秘而高深莫測，作風硬朗、有主見，對西方國家尤其不以為然，同黃藥師一樣獨據一方，武功高強唔在講（無人唔信佢真係好打得），每逢婦女節吟詩，近排招呼習大大時仲表演彈琴，問你死未？

普京有幾勁相信唔使多講，趁奧巴馬得把口，即刻把握機會借敘利亞爭奪中東話語權；美國大選耆英鬥耆英，輸咗果邊一口咬定話有俄羅斯黑客操控，又話侵班子一個二個見過俄國官員乜乜乜，搞到侵侵一上台就一身蟻，普京淡淡定話「可能真係有愛國黑客咁做都唔出奇」，不過俄政府絕對無做過，而且「我唔信黑客會影響到選民投俾邊個」，成班如狼似虎嘅國際傳媒大老都無佢符。

好啦無論如何，班美國人選件西毒侵出嚟神憎鬼厭，連鎖效應就係個個unfriend美國，轉移目標同普京做friend子，唔講真係唔知佢其實係無去到G7峰會（俄羅斯係G8成員國之一，但因為克里米亞問題被凍結會籍先變成G7），喺侵侵令America Great Again之前，普京應該會先令Russia Great Again。

不過講到近排在國際舞台令人眼前一亮嘅領袖，就梗係新任法國總統馬克龍啦。佢唔止後生靚仔，仲要有吉屎。西毒侵成日借握手（或唔肯握手）玩盡各國話事人，馬克龍第一次同佢握手，就大大力揸到侵侵隻手到白埋，到大合照時仲特登扮睇侵唔到，同個個握晒手先「係咁兒」同佢揸揸手，雖然嚴格嚟講飛雲係唔識佢哋嘅，但真係忍唔住個心好涼快囉。

馬仔最令人佩服嘅地方，係佢唔單止唔俾面西毒侵，竟然連強人普京的虎鬚都夠膽捋。普京到訪法國，馬仔毫不留情地當面連番抽擊：斥親俄媒體報道假新聞、提車臣同性戀人被控案件、在敘利亞問題畫出不可逾越紅線，要求交戰雙方不得使用化武。令人意外的是，向來面對西方領袖都係Cool魔上身的普京，完全無黑面，甚至對馬仔的坦率相當欣賞，人前人口對佢讚不絕口，說對方有助兩國改善關係。

相關文章：當面狠批普京仍獲對方讚賞　法國總統馬克龍盡顯領袖風範

年齡相差一大截的兩人，惺惺相惜程度足可媲美東邪黃藥師同楊過，黃因討厭世俗禮教而跟小輩楊過一見如故，普京跟馬克龍會面後，一直用慈父一樣的眼神追隨對方。

有趣的是，西毒歐陽鋒收了楊過做義子，向來高傲的侵侵面對馬克龍時總是想惹對方關注，也有異曲同工之處。馬仔仲將侵侵句口頭禪Make America Great Again（讓美國再次強大起來），改成Make Our Planet Great Again（讓地球再次強大起來），仲好娘咁整咗張疑似英文長輩圖放喺佢個人Facebook度添。

不過講到馬仔同楊過最似的地方，當然係佢哋都係愛上一個比自己年紀大的女人，而且仲係「無懼世事變改還是越難越愛」果隻癡心情長劍啦。楊過同姑姑小龍女一別16年才修成正果，15歲的少年馬克龍愛上較他年長24歲的老師，他也苦等15年在30歲那年迎娶心愛的她。

相關文章：有7個孫的最年輕總統？ 39歲馬克龍坦言若當選 忘年妻續任軍師

東邪西毒南帝北丐個個身懷絕世武功，但係五絕之中有一個人的武功稍微高過佢哋少少嘅，佢就係全真派祖師爺、中神通王重陽喇。飛雲真係唔夠膽講邊個做到王重陽，純粹以國際形勢來比較呢，祖國總舵手習大大相對最接近嘅，《巴黎協定》被西毒侵搞串Party，中國及時挺身而出，加上一帶一路連結各國，在美國將世界領袖地位唔知掉咗去邊之時，中國或者可以冷手執個熱煎堆也說不定。

相關文章：【視角】夥歐撐《巴黎協定》　環保事中國有Say　勢成新推手