【每逢大事講故事】全球和應「美國優先」 Let's Make HK Second
情人節又殺到，正所謂每逢佳節倍唏噓，飛雲都忍唔住要唱句「那動人時光 今日常回看」。男人可以有幾長情？聽下Juno橫跨十年嘅《念念不忘》三步曲一定Feel得到。雖然平時聲大夾無準，又不時對女士們出言不遜，但美國總統侵侵其實都係一個長情嘅人，不過呢位呢幸運的女士並非佢果位靚爆鏡嘅第一夫人梅拉尼婭，而係艾美。咁啱得咁橋，侵侵同艾美又係糾纏咗十年。
侵侵咁自戀，鍾意自己多過任何一位女伴基本上同實際上都係理所當然。所以生意蝕錢公司破產幾多次呢啲濕碎嘢，佢真係Sorry, I don’t care！含住白金鎖匙出世嘅佢作為人生勝利組，錢，大把，女人，又係大把，佢最關心係咩？咪就係全世界都知道同認同佢有幾叻幾有成就囉，因為呢啲嘢，係無論有幾多錢都買唔到嘅。
身為超級有錢佬嘅佢，每秒鐘閒閒哋幾百個上落，時間咁寶貴做乜鬼要走去拍個叫《飛黃騰達》（The Apprentice）嘅真人騷，仲足足拍咗十年咁耐？因為佢覺得個節目可以同所有人宣傳自己有幾厲害嘛，唔通貪果兩億美金人工咩，對佢嚟講，身家零頭嚟咋呢啲。點解要拍十年咁耐？咪就係一開頭講果位艾美累事囉。
如果為侵侵拍真人騷嘅目的整個Check List，應該會係咁樣嘅：
侵侵《飛黃騰達》Check List
為自己宣傳，剔
為女兒Ivanka，宣傳，剔
順便為公司宣傳，剔
拿超高人工以示真材實料，剔
高收視率以示受歡迎程度，剔
攞艾美獎以示成就，交叉
張清單上面幾乎所有嘢佢都做到了，就只差攞獎這一項。如果你心諗：有票房、有頂級片酬、有靚女伴，連業界都認同你，咁仲唔夠咩？咁少年你就真係太年輕鳥，唔信你問下里安納度迪卡比奧，或者華仔、星爺開齋前點諗？作為完美主義者，個靚到爆燈嘅CV上面，就只差攞獎呢瓣漏空咗，就係你係你係你呀艾美！
拍拍拍，係咁拍係咁拍前前後後拍咗14個Season，成十年呀大佬，人生有幾多個呀？呢位一向耐性麻麻哋嘅大少爺，竟然拍呢個橋段重覆又重覆嘅節目十年咁耐，真係火都嚟！無錯喇，受夠了嘅佢最後喺自己個Twitter開艾美波：
「奧斯卡同艾美獎，邊個衰啲、邊個狡詐啲？」
以為自己攞硬獎威威，點知等嚟等去都攞唔到，艾美獎仲唔係受到有心人操控？是時候出絕招了，一貫侵大少反枱三步曲：Twitter開拖，絕交，劈炮唔撈！世人估佢唔到嘅係，為咗報復，佢竟然走去選總統，好衰唔衰仲要贏埋。唔俾獎我吖嗱？我就走去做總統，日日喺白宮逼你班友睇我表演，日日鬧爆你斑左膠媒體同演藝界！
當年拍《飛黃騰達》侵侵一句「You're Fired!」Soundbite街知巷聞，對美國觀眾口味瞭如指掌嘅佢，參選時整咗句非常入腦嘅口號「Make America Great Again!」連三歲細路都記得，入腦到無論班左膠傳媒點笑佢踩佢都整佢唔死，事實勝於雄辯，叫聲總統先生啦。就職典禮當日，全球幾百億觀眾睇佢表演，佢無令大家失望，再整句更入腦嘅Bite出來，成晚係咁美國第一（意思係事事以美國優先），America First, America First, America First，睇到飛雲發開口夢都識噏。
侵侵：「別人笑我太瘋癲，我笑他人愛膚堅！」
世人嘅眼光係雪亮嘅，呀艾美係都唔頒獎俾侵侵，激到佢去選總統，實在太過份喇，一向充滿正義感嘅荷蘭人睇唔過眼，整咗條叫「美國第一，但荷蘭可唔可以係第二？」嘅片出嚟，表面上扮衰仔，認美國做蝙蝠俠大佬，自己做二哥羅賓，實際上可能想曲線送侵侵上艾美獎頒獎台，等佢終於可以威返次咁囉。（手機用戶按此）
荷蘭搞笑節目主持人Arjen Lubach，喺1月侵侵剛宣誓就職之後幾日，在節目中播出一段短片，向侵侵介紹點解佢應該揀荷蘭做二佬。為咗送侵侵一程（上艾美獎頒獎台姐，咪心邪），條片用咗一把同侵侵把磁性聲音似到十足十嘅旁白讀稿，內容仲用咗侵侵字典入面老是常出現嘅great、absolutely fantastic、fake同losers等字眼，嘩，佢唔講真係以為係侵侵本人囉～為咗幫侵侵荷蘭人真係用心良苦。可能，呢啲就係愛呀哈利。
侵侵被美媒逼害，明眼人都知，荷蘭人條片一夜爆紅，令全世界齊齊和應拍片幫侵侵兼同佢示好，好似瑞士人條片就話：「我哋好遲先俾女人投票㗎，侵侵應該會鍾意呢一點。而且呢度好安全，因為冇墨西哥人嘛」。
飛雲心諗：今次仲唔係黃金機會嚟？鋤強扶弱呢家嘢飛雲都識，等我即刻代表香港同侵侵伸出友誼之手，介紹下呢粒東方之珠，話唔定佢會帶挈埋我哋「Make Hong Kong Great Again」呢。趁仲係正月，飛雲向侵侵拜個年，祝佢今次嘅「作品」紅遍全球，演藝生涯更進一步，早日攞到艾美獎填補CV上那個永不磨滅嘅洞，去片～
「美國第一，但香港可唔可以第二？」請掌聲鼓勵！啪啪啪！
以下就係瑞士版：（手機用戶請按此）
就連一直同美國唔多妥嘅伊朗，都拍片向佢致敬。仲好細心咁教佢分清楚伊朗（Iran）同隔離果個叫伊拉克（Iraq）的國家嘅分別，溫提佢用手機打行政指令果時唔好唔小心打錯字搞到「打」錯隔離，真係巧令人「簡棟」巧有愛呀！
以下就係伊朗版：（手機用戶請按此）
澳洲人認真唔話得，前排總理特恩布爾（Malcolm Turnbull）同侵侵講電話「被Cut線」，佢哋依然肯拍片撐侵侵，仲話「澳洲袋鼠就多，人就無乜，相比之下侵侵個就職典禮真係勁多人囉！」個個都想爭做二哥，佢哋唔執輸照講「希望美國第一，澳洲第二」，但補多飛：「或者最起碼，最尾先炸澳洲吖好無？」真係卑微得抵錫㗎jack！
以下就係澳洲版：（手機用戶請按此）
如果想睇晒咁多個國家，可到以下網址：
http://everysecondcounts.eu/index.html