網民稱參觀示範單位不慎踩到大嬸　對方怒呼「我係長者」要求道歉

後生一輩常嘆「年輕是原罪」，與「老友記」的世代之爭沒完沒了。近日有網民於facebook群組發文，稱自己參觀示範單位時不慎踩到一名大嬸的腳，儘管已即時道歉，對方仍多次高呼「我係長者呀」，怪責樓主不小心，其同行朋友及兒子亦未有問清事件來龍去脈便加入怒罵。網民看完帖文紛紛怒斥涉事大嬸「持老賣老」，直言「有啲人係唔值得對佢哋有禮貌」。

下載「香港01」App ，即睇城中熱話：https://hk01.app.link/l7U1Y7t5LO

有女網民昨日於fb群組「Tai Po 大埔」發文，稱參觀示範單位時，因走廊通道狹窄，轉身時不慎踩到一名大嬸，當時她即時道歉並問道：「唔好意思，你有無事」，惟對方即大聲回罵：「梗係有事啦！你踩到我呀！」

樓主為免小事化大，再次向對方道歉，解釋事件純屬意外，但大嬸卻擋住去路並指罵：「你知我老就好啦！我唔只老呀！我係長者呀！我係長者呀！我係長者呀！你咁後生你要讓我呀！咁後生你知唔知醜呀！」

樓主形容大嬸「好肥大好強壯，阿婆都未算」，面對對方瘋狂指罵只感到「無奈又好笑」，為了「走人」只好再道歉了事。大嬸見樓主多次道歉，亦「收貨」稱「我見你咁有誠意先原諒你」。但這時大嬸的女友人及兒子趕至，未問因由便「衝上嚟」對樓主大罵，即使樓主解釋已向當事人道歉亦未有理會，該名女友人更要求樓主在眾人面前「真心誠意講對唔住」，激起樓主的怒火。

樓主後來雖再次道歉，但不滿大嬸的友人及兒子「唔知頭唔知路」便向她怒罵，忍不住說：「知你長者啦！你嗰頭近我咪讓下你囉」。樓主說，大嬸的兒子聽到這句後「癲咗咁衝上嚟想打我」，更一度稱「你係咪想打我呀！我報警啦」，幸同行的地產經紀即時上前擋住，最終大嬸及其友人和兒子在場繼續怒罵，直至保安到場才調停事件。

樓主於帖文指事發時並非覺得憤怒，而是「好驚訝真係有咁既人，覺得荒謬多過任何情緒」，又指將會「指導吓屋企老人家唔好畀佢哋出去丟架」。大批網民力斥涉事大嬸恃老賣老，直指「有冇教養與年齡並無任何直接關係」；有網民認為樓主應反駁對方，慨嘆「唔識惡就會畀人惡返轉頭」、「現在出街，真係要練習定隨時開拖」，不過亦有人認為教養與年齡無任何直接關係，「香港好多年青人及年長人都好有禮又樂於助人」，希望不要因一兩次不快經歷而製造兩代人的隔膜。

（fb群組「Tai Po 大埔」）