【熱評】德國環保慳電法 交通燈夜晚唔開工 仲有長假放
文：陸小菲
德國人對交通局制度上的想法，對做香港人嚟講真係非常大膽又出色。最令小菲驚嘆嘅當然就係小菲之前講過德國公路無上限，可以畀你體會無限速的快感，感受嗰種狂飆嘅暢快。今次小菲想同你分享嘅係德國嘅交通燈。
下載「香港01」App ，即睇城中熱話：https://hk01.app.link/qIZYuEC5LO
講起德國嘅交通燈，你可能會諗起嗰種專做遊客手信生意成行成市嘅 Ampelmann 交通燈公仔。雖然當時德國統一，但係大家都好 nostalgic（編按：懷緬），所以齊齊反對連燈號個icon都要整合嘅決定，所以最終德國唔需要連個交通公仔都統一埋。就係咁，留低咗東德嘅特色。不過小菲喺現實生活裏面，比較常見嘅都係人車（單車）合一嘅交通燈。
而最為趣為妙嘅係，喺比較細小嘅城市入面，交通燈會喺夜晚閂埋唔運作。即係話，呢度人同車都唔算多，夜晚過馬路你就自己睇路啦。平時叫你熄燈一小時響應下環保都可能攞你半條命，但德國交通燈真係會熄足一個夜晚嚟慳電！呢個不特止，小菲最後知道，原來公眾假期裏面，屬於小鎮唔多人嘅交通燈都會熄埋，嗱嗱嗱，有圖有真相（相片為小菲朋友提供）。
你知啦，荷蘭都有搞「+Lichtlijn」計劃，除咗舉頭望交通燈之外都可以低頭睇到LED光線，確保低頭族日日夜夜都睇到燈號，以減少意外發生。不過喇喎，對自己汽車咁有信心嘅德國人又點會覺得過馬路有難度？放假熄燈合情合理。比支燈休息吓啦。
順手講吓，其實好多地方都有每日「瀏覽量」超高嘅交通燈公仔嚟發表唔同訊息，當中Madrid（馬德里）響應做出 LGBTQ pride 嘅同性 couple 燈號。不過小菲覺得最出色都係維也納，款式多又靚。
Facebook：陸小菲 Fifi Luk 與某種憂鬱的聲音
（文章標題由《香港01》編輯所擬。文章純屬作者意見，不代表《香港01》立場。）