ZOHO WiFi 分享網絡與翻譯機開箱！千六蚊玩翻譯加 WiFi 蛋

去旅行唔識講當地語言未必輸蝕，但食飯就無可避免會有啲麻煩，一來要慢慢睇菜單，二來叫菜時下下都 This This This，講得多都口臭失禮。今次介紹「ZOHO WiFi 分享與翻譯機（A8）」睇落同坊間有賣嘅翻譯機差唔多，唔係細心留意啲字都唔知佢有咩賣點。

英語世界嘅地方都仲好啲，英文再差都講得到聽得到，去西班牙或者法文地區，大城市當然無問題，但去一啲二三線城市已經語言不通，無事發生還好，唔識路搭錯車想問都唔知點問。

去日本韓國多嘅應該都有類似體驗，普普通通去下東京大阪首爾當然無問題，但離開大城市，去下附近啲城市仔，入下啲溫泉區，去啲非旅客區，點菜真係苦過 DD，最麻煩係連 7-11 都無嘅時候，真係雞同鴨講。

有啲朋友話去外國駛咩呢啲翻譯機，反正身體語言搭夠，但當你試過旅開旅客區，試過入一啲地道小店但溝通唔到嘅時候，你就明呢啲翻譯機幾幫到手。有時啲野唔係你諗覺得佢幾幫到手，係當你無佢嘅時候先發現原來唔可以無。

支援語言啱香港人

今次介紹呢部「ZOHO WiFi 分享與翻譯機（A8）」睇落同坊間有賣嘅翻譯機差唔多，唔係細心留意啲字都唔知佢有咩賣點。大部份嘅翻譯機標榜支援語言多，呢部話支援 50 種，個部話支援 80 種，實行以量取勝，但其實大家用來用去咪又係個幾種，最緊要常用嘅都有。

「ZOHO A8」支援嘅語言根本為香港人而設，一來有廣東話，二來有日文、韓文、泰文、法文、德文、意大利文、俄語、荷蘭語、波蘭語、捷克語。日韓泰，西歐呢啲無問題。去北歐嘅話有埋挪威、丹麥、芬蘭、瑞典，就算去東歐都有希臘、匈牙利、斯洛伐克，加埋其他好似印尼、阿拉伯等等，基本上你會去嘅都有齊。

使用上好簡單，揀左想要翻譯嘅語言後，係下面嘅按鈕按，然後對住講就識翻譯出來，識聽識講會叫係差唔識跳。細細個有用過快譯通個啲字典嘅一定識得用。

翻譯同時係 WiFi 蛋

「ZOHO WiFi 分享與翻譯機（A8）」最特別嘅唔係使用方法，係部機真係有為旅行人士想過。除左翻譯功能外，佢本身仲係一隻 WiFi 蛋。今時今日去旅行邊有可能唔買定 SIM 上網，將 SIM 卡插入去 ZOHO A8 到，一來可以翻譯，二來可以將 SIM 卡訊號分享埋出來用，一機兩樣，方便至極。

一般嘅翻譯機又要 WiFi 連線，去到外國旅行除左帶佢做翻譯，仲要帶多隻 WiFi 蛋，費時失事。本身去旅行帶嘅野都唔少，少得一樣得一樣。一部機做番 WiFi 蛋又做埋翻譯機呢啲先係貼心嘅設計，真係有為用家想過。

總結：一機兩用頗吸引

總括來講，成部 ZOHO A8 最吸引係可以一機兩用。去旅行嘅拿佢來做 WiFi 蛋，有需要時先係背包拿佢出來做翻譯機，單係入餐廳叫餸都夠哂方便。不過唯一怕係小心唔好用晒啲電，冇得翻譯就麻煩啦。

【本文獲「Mobile Magazine」授權轉載】

《香港01》App，精彩遊戲、動漫、好玩gadgets情報攻略及評測即時放送！
立即下載： https://hk01.onelink.me/FraY/hk01app