【攝谷．專訪】動手不動口 食物攝影定律：「千祈唔好食」
走進餐廳，一頁一頁地揭着餐牌，看到相片中牛扒外層微焦，內裏卻透紅嫩滑，雖未嗅到黑椒蒜香卻已令人垂涎，急不及待呼喚侍應。「講到尾，做商業攝影，都係想幫到個客，令菜色可以叫好又叫座。」香港專業攝影師公會（HKIPP）成員，食物攝影師吳華（Benny Ng）說。
「『圖片只供參考』就一定要寫明架啦。但係你買果份套餐，會有幾多粒魚蛋、幾多塊多士，就唔可以呃人，份量係咁多，就影咁多。如果你碟叉雞飯唔一定係雞脾，就唔好影雞脾」。
作品：©吳華（由受訪者提供）
攝影（訪問部分）：蘇煒然
撰文：蘇煒然
學攝影像學遊水 需經過實踐練習
Benny的攝影生涯，由觀塘職訓說起。他讀了一年的全日制課程，之後成為攝影助手入行。「想增值下自己」，於是Benny又上了3年的理工大學的應用攝影夜校；86年畢業後擺脫了助手身份，跟朋友合夥開設了影樓的生意。
「讀書好架，你學到理論嘅知識。但係做攝影助手，就好似去學游水，教練帶你落水實習先真正學識」Benny說。
市場變化改變攝影方向
「舊時嘅攝影市場冇劃分得咁仔細」，Benny當年幾乎甚麼都拍。樓盤示範單位、店舖櫥窗、產品模特兒、甚至乎當年尚未禁止的香煙廣告，都會拍攝。隨着大眾開始追求更漂亮的畫面、餐廳要求更精美的餐牌，原本「周身刀」的攝影師亦開始要專注在少數、甚至單一的題材上走得更遠，這是市場大勢的變化，也是事業的機遇。
Benny和幾位合作夥伴有不同的方向發展，他認定了自己較喜歡靜物攝影，於是在分道揚鑣後開設了屬於自己的攝影公司。
香港 · 攝谷 2018將會有包括Benny在內，多位專業攝影師作品聯展，還有不同講座、示範。按此以優專價訂購門票！
接大Project拍足一年
「就好似雞同雞蛋嘅關係」Benny說：「比心機去影，Portfolio就會多咗呢類型嘅相，於是就自然多咗需要影食物嘅客人」。2005年，一家大型跨國食品公司想要統一亞洲各地區的品牌形象，需要重新製作所有，上百樣的產品包裝和宣傳品，除了委托大型設計公司以外，亦在東南亞找來了3位攝影師，Benny是其中之一。「去咗6個地方，前前後後影咗1年」，是他拍攝過最龐大的項目之一。
「先飛過去開會，傾好有乜要影、要點樣影；返香港準備好，再飛過去正式開工」。那一年Benny在菲律賓、馬來西亞、越南、新加坡、上海和香港之間來回，Benny再解釋：「有啲食材係香港冇嘅，但運過嚟又變咗唔新鮮；另一個情況係，果樣食物只有當地嘅Food Stylist（食物造型師）先識煮。例如『菲律賓魚湯』，普通香港Food Stylist係唔會識。」Benny形容這次的工作是個難得的機會，過程中遇了友好的工作伙伴，也碰上不同的挑戰，又一一克服，此後便專注在食物攝影上面。
Food Stylist也會煮出「地獄廚神」的味道
Food Stylist（食物造型師）的工作是負責將食物變得精美，包括揀出那條翠綠晶瑩的菜心、剔走那不規則形狀的蘿蔔粒；必要時更要大顯廚藝，親手烹調出看起來令人唾涎欲滴的食物。惟Benny說：「做食物攝影嘅黃金定律：千祈唔好食！」他解釋，Food Stylist的工作是令食物變得漂亮，味道、食物安全均在不考慮；輕則未煮熟，或者暗藏牙籤、鋼針（固定食材），重則動用假材料！
「用白膠漿扮鮮奶」，Benny舉例拍攝早餐麥皮，浸在真的鮮奶裏面，麥皮會溶會爛。另外，真鮮奶太稀，作為裝飾伴碟的雜果可能會到處飄浮無法固定，甚至沉到碗底。Benny指着一張冰凍啤酒的照片，又侃侃而談：「啲『水珠』同『碎冰』可以保持一直唔會流走、唔會融」，原來，「水珠」是用甘油加水，噴到玻璃樽上面；而「碎冰」卻是用人工聚合物製成，在網上可以訂到，原本呈粉狀，加水後則會變成碎冰的模樣，但不會輕易融化。
冰凍啤酒並不冰凍，沸騰的火鍋亦不燙口。「我駁咗金魚缸果啲氣喉，一共3條，扮到水滾咁樣。然後用大生菜遮住機關，煲底個火就係Photoshop上去。」同樣道理，要是真的把水煲滾了，食材很快會爛，而且濃密的水蒸氣只怕會阻礙拍攝。
避免肺部受罪 發明「噴煙」道具
講到煙霧蒸氣，Benny回憶當年做攝影助手時候，老闆接拍不少香煙廣告，都用真煙拍攝。「老細叫到：『Benny！』咁我就點着支煙仔，吸兩啖，然後換支飲筒，對住老細指示嘅位置就噴！」然而Benny本身沒有吸煙習慣，每次拍攝都讓自己的肺部受罪，「咁唔係辦法喎！於是我試下、搞下，最後用個相機吹塵果啲氣泵，剪咗個尾，插支煙仔落去，吸幾下噴出嚟，又得喎！」那天老闆又再呼喚Benny，他於是將這個發明拿出來，最終獲得了認可，「後來都見到有人用類似方法，邊一個早啲發明就唔知啦！」不過現在利用電腦都可以做到逼真的效果，相片中食物熱氣騰騰，Benny的工作室裏卻嗅不到香煙的氣味。
除了食物本身以外，一張食物相片還有很多其他的元素，包括燈光、餐具、背景等。「一份海南雞飯，無理由配一套日式碗碟；一個茶記早餐，冇理由放蠟燭營造燭光情調」。食物攝影要展現食物的特質，了解它的文化背景，用相應道具來襯托；又或配合餐廳本身的裝潢設計、餐牌排版，這都是Benny的日常工作，「有啲客人冇Budget另外請Food Stylist，我都要兼顧埋」。
階段踏腳石一年已夠
行業價格從來都是一大頭痛位，關於攝影師、客戶之間的期望與現實。「兩千蚊、三千蚊任影嘅亦都大有人在，有部相機、有支閃燈就俾人感覺係專業。佢地有佢地嘅市場，但同時亦都有客人係肯俾一個貴嘅價錢，影得好，影得靚。」Benny續道：「一啲新人初期可能要收得好平，但呢個階段只係一個Stepping Stone，你要盡快影得好啲，整靚個Portfolio，對自己有信心，半年到一年時間，就要將自己提升上去。否則錢又少，Portfolio又弱，只係不斷『捱』。」