【宏利專訪】MPF基金經理其實唔易做　表現亮紅燈隨時被叮！

強積金常被打工仔戲稱為「強迫金」，除了要交MPF管理費，基金表現亦非時時盡如人意。然而，近年一眾MPF受託人為了守住打工仔的「隱形荷包」，近年已對旗下基金表現愈來愈着緊，亦相繼推出措施，減輕基金管理費。
宏利香港僱員福利業務部副總裁兼主管吳清發，強積金倉位高達7位數字，更每月「供凸」約15%供款，與打工仔「坐埋同一條船」。他透露，為了睇實打工仔的血汗錢，宏利已設立監管機制，一旦基金經理「交唔到貨」，隨時會被叮走！

環球股市今年「跌極都有」，中港股市更成為震央，恒指曾由年初約33,000點高位下跌近9000點，令打工仔的MPF戶口大出血，今年以來已倒蝕超過1.6萬元，其中單是港股基金，已狂蝕逾13%！

基金表現兩極　FundMan能力好緊要

市況波動之下，打工仔自然希望MPF表現「醒醒定定」，以免辛苦儲來的血汗錢化為烏有。翻查積金局平台數據，受累大市下挫，今年以來全線港股基金難逃一跌，但不同基金的虧損程度仍然相當兩極，一年期虧蝕介乎8.64%至15.57%，差異高達1倍，反映個別基金經理（FundMan）的管理能力相當關鍵。

吳清發（Raymond）於公積金及強積金行業打滾超過18年，他教路打工仔，揀選基金時其過往表現固然重要，但亦不能看得過份長線，「話晒依家投資氣候同10幾年前好唔同，騰訊（0700）同阿里巴巴以前邊度存在？我自己就會睇1、3、5年表現，唔會睇太耐，因為基金經理人事會變動，每個基金經理都係睇佢個人表現！」

設紅綠燈機制　表現唔掂或踢走

吳清發自言，自己作為MPF的「忠實粉絲」，對公司旗下基金經理的表現特別上心。他介紹，宏利早前已建立一套「綠、黃、紅燈」監察機制，一旦基金經理表現連續幾季跑輸中位數，隨時要「執包袱」走人。他介紹指，「我哋有一套機制計算基金經理表現，表現唔掂就要上嚟照肺，再係翻身失敗就要着『黃燈』，會出警告信。如果都係無改善，就要着『紅燈』，考慮換人。」

MPF始終屬於打工仔的點滴血汗錢，面對基金經理表現「肥佬」，宏利亦毫不手軟，「好似我哋嘅康健基金，之前個基金經理表現唔掂，直程要由美國飛過嚟解畫，最終於5月決定撤換。」他指出，該基金於更換基金經理後，選股風格隨即出現「180度轉變」，並成功帶領基金「大翻身」，相信反映其監察機制有成效。

至於受託管理宏利強積金的外界基金公司，吳清發就透露，計劃引入競爭，迫使他們「交功課」，「期望最快明年實行多元化經理制度，引入多個基金經理，邊個做得好就畀多錢佢管，做得唔好就畀少啲。」

管理費高低　不宜盲目追求

積金局主席黃友嘉早前指，截至5月強積金平均開支比率已跌至1.53%，為MPF推出以來最低。宏利亦於8月宣布大減強積金管理費，減幅最高達47%。吳清發稱，宏利亦會按照客戶的年資及資產額，提供不同程度的管理費折扣，但他奉勸打工仔，不應盲目追求低管理費，「依家好多MPF受託人提供被動型基金，管理費係好平，但呢個又係咪你想要？個市一升，你咪會鬧佢升得慢囉。」他認為，相比起管理費高低，受託人能否提供充足的基金選擇更加重要。

吳清發又指，公司計劃藉由電子化壓低行政成本，從而回饋客戶。他介紹指，宏利今年推出針對中小企僱主的人力資源管理App，新入職員工可於App上完成整個MPF申請程序，亦可透過該平台請假、填寫公司表格等，日後或會推出視像理財教育等功能，現時已獲超過300個僱主使用。