宏利MPF一哥　百萬倉「神操作」避兩次股災　睇好呢類基金無得輸

中美貿易戰、美國加息等多路因素夾擊之下，港股一度由年初高位急瀉達9000點，連累打工仔的「隱形荷包」強積金損失慘重。MPF顧問公司駿隆便統計指，年初至今打工仔的MPF戶口已蝕超過1.6萬元。
宏利香港僱員福利業務部副總裁兼主管吳清發，憑藉多年來操盤有道，其強積金戶口已滾存至7位數字，今年更於港股仍處高位時「急流勇退」，轉投美股基金，避開中港股市漫長跌浪。
近日港股由年內低谷爬升，但有分析指明年波幅「有過之而無不及」，既然歷史可能重演，吳清發揚言，打工仔正是最好的基金經理，要贏錢只能靠自己落力管理！

今年以來環球股市震完又震，恒指於1月觸及33484點高位後一路下挫，於10月更低見24540點，高低波幅近9,000點，相當於去年全年約8300點升幅。近日中美貿易戰休戰，雖然為市場打下「強心針」，但不少分析預料，兩國將來的談判將舉步維艱，港股波幅隨時更加誇張，有專家更指明年恒指波幅或超過1萬點。

3月沽清港股　兩次操作連避港美股災

面對波動市況，MPF雖然仍是「焗住要供」，但只要夠勤力，其實絕非「焗住要蝕」。宏利強積金一哥吳清發（Raymond）透露，自己於今年3月恒指仍處約31000點水平時，已將手上MPF悉數轉倉至美股基金，食正其年中升浪。他再於9月底撤出美股，將7成資金放於保證利息基金暫避，再度避開當地大跌市。

兩次「神操作」，教人嘆為觀止。總結經驗，他揚言，打工仔要趨吉避凶，與其獨沽一味只靠基金經理，倒不如靠自己，「其實打工仔自己就係基金經理中嘅經理，因為無一個基金能夠一直贏落去，要贏嘅就係靠自己主動管理！」

MPF要「長短兼備」 　新錢最好夠進取

不過打工仔勞碌一天，放工回家後已是筋疲力盡，要博覽時事捕捉股市上落，卻又談何容易？吳清發早年於加拿大大學商科畢業後，隨即進入公積金及員工福利行業，今年6月起升任宏利強積金一哥。雖然於金融業浸淫多年，但Raymond笑稱，其實自己與一般打工仔一樣不太「貼市」，管理MPF全憑一套「長短兼備」的MPF投資心法。

他教路，打工仔在揀選供款計劃時，最好以進取行先，「我每月供款嗰啲新錢一定係進取，因為我唔識揀啱時間入市（Time The Market），只能夠揀個有信心嘅行業，放長線釣大魚。」他透露，自己現時3成「舊錢」以及新供款，均配置於健康護理主題基金，「首先我對呢個板塊幾樂觀，尤其人口老化係全球大趨勢，你買科網股可能都有得輸，但健康護理行業長遠應該係無得輸，所以呢部分『舊錢』我係打死都唔郁！」翻查積金局數據，縱然環球股市於過去一年多災多難，惟宏利旗下的MPF康健護理基金仍暫錄得約4.27%回報，逆市企穩。

投資最重要攻守有道，強積金當然亦不例外，吳清發就指自己視乎大市，調配其他7成「舊錢」，一年轉倉至少兩次，有時心血來潮亦會「心掛掛」，「例如我今朝揸揸吓車突然諗，中國喺貿易戰又點會一直捱打？會唔會救市呢？係咪都應該買啲A股？」

訪問於9月中進行，其後美股於10月創新高後爆發股災，中港股市反而開始跌定回穩，Raymond的投資眼光果真「唔講得笑」。他透露，自己在9月底將手上美股基金全數沽清，轉倉至保證利息基金，但貫徹「新錢」應進取的方針，繼續供美股、大中華股票及健康護理主題基金。

每月供凸15%　貪MPF夠貼身

但投資不僅要靠眼光，更要夠勤力。吳清發提醒，打工仔應該每年最少一次檢視自己的強積金戶口，「平時有Statement嚟到至少都要望吓，試諗吓你娶個老婆返嚟，日日都唔理佢會點？日日都呵護備至又會點？」但他對MPF這個「老婆」的呵護備至，並不止日思夜想這麼簡單，更甘願為它「俾凸家用」。吳清發引述港大調查指，港人普遍願意為強積金作5%至6.8%自願性供款，而他自己則「供凸」超過15%。

強積金不時被戲稱為「強迫金」，部分港人恨不得盡快將MPF戶口「現兜兜」提取。但吳清發就反問：「你咁多錢擺喺銀行做咩？就算你喺出面買個基金，收費或者差唔多，但強積金平台一定更適合計劃退休。」他認為，MPF有更多「貼身」配套，例如數碼化管理平台等，而自願性供款的門檻亦低至每月500元，「你試吓拎500蚊叫出面啲基金經理同你『貼身』？No Way！」

Raymond又指，就算他日退休，亦不會急於提取MPF戶口資金，反而希望繼續「錢滾錢」。「退休後會有好多意料之外嘅使費，包括醫療，所以真係要繼續投資。」他透露，保險業界正與積金局研究，容許退休人士提取資金時，同時可以繼續投資，並提供一定的穩定回報，相信屆時可為退休人士提供更多選擇。