【大大力十戒歌】艾粒新搞笑歌又係萬能key　亂入《警訊》又夾到

艾粒出道十五周年「開光大典」舉行在即，矮佛當奴同靚佛阿占已經預早Set定個頭拍片……（做咩「佛」都有頭髮㗎？）喂喂喂！唔該將個焦點放翻係雙佛嘅慈悲為懷上，今次雙佛為各善信送上的《大大力十戒歌》，在短短一分鐘內充滿咗人生奧祕，過萬人在60秒內迅間頓悟！

小編聽完第一句「唔好發家人脾氣」之後，迅間淚流滿面（有冇咁誇？），就係因為我噚日睇咗一條片！

警察平時就好似慈母一樣愛錫住香港人，仲時不時拍《警訊》提醒大家，5月14日適逢母親節慈母又出招喇，今次係講一個Daddy「賣女」嘅故事，當中嘅父女爭吵情節，最後搞到爸爸犯法。

要避過呢場浩劫有咩方法，一齊睇下大師點講：

首先「唔好一腳踏兩船」，成個故事的開始，就是由Daddy煽動原本有男朋友的囡囡再識個富二代男朋友開始，Daddy唔好貪心咪冇事囉。

第二「唔好講人哋是非」，片中Daddy成日「尖頭仔」、「尖頭仔」咁叫囡囡的男朋友，又話人冇錢冇樓、厭棄人，搞到囡囡唔開心，最後不幸嘅事就發生咗喇，嗚嗚。

第三「唔好成日玩手機」，雖然唔小心跌嘢落街唔算犯法，但片中囡囡同男友傳完訊息後，一時分神跌咗件衫落街，你話如果因為咁而扑中人點算呢？

正所謂一家人最緊要齊齊整整，我再重申一次雙佛嘅教誨：「唔好發家人脾氣」，以免招來牢獄之災！