艾粒憶被魯芬抄牌介紹工作：我哋呢啲蝦仔都記得

DJ當奴和阿占合體出席商台團拜，惜日子剛好碰上魯芬BB離世，難免有傷心的感覺，艾粒直言與魯芬BB有過幾次見面的機會，最深刻的就是當年兩人主持TVB節目《逐格鬥》，魯芬BB是首集嘉賓：「嗰時佢叫我哋畀個電話嚟，話係大陸同澳門都有好多騷，可以搵埋我哋玩，佢好睇我哋啲細，我哋兩個對佢嚟講係小蝦仔，未必記得我哋。」兩人表示魯芬BB之後真的有為他們介紹工作，可惜檔期問題令合作告吹：「都幾唔開心，突然間兩個禮拜內發生，佢好熱情，佢係惡，但其實係知你覺得你佢惡所以扮惡，真係好專業。」

宇宙巡迴最尾一站

而艾粒在下月頭將會在首次在澳門開騷，於威尼斯人舉行《YO! 聖艾粒battle五行欠》宇宙巡迴-澳門站，話就話宇宙巡迴，不過其實巡到澳門就完，騷名只是純粹自抽，兩人更開玩笑說：「其實好多地方想我地去，我地堅持個Set要同香港一樣，我哋唔肯妥協，最尾搞唔成，澳門會做返啲香港做唔到嘅嘢，譬如我哋本身想玩拋膠波，用幾皮嘢買咗個大波波，但香港唔畀拋。」他們更表示今次的製作單位是為BIG BANG搞騷的同一公司，當奴更戲稱今次是自己入伍前的最後一次Talk Show。