【有片】高海寧陪男友睇波仲識嗌「越位」 世界級女友唔使靠撒嬌
高海寧最近在《不懂撒嬌的女人》飾演善解人意，處事圓滑的田蜜，她大爆今晚劇情，將會挑逗已經情傾宣萱的林文龍。至於現實中，高Ling是一個世界級女友。根據過去經驗，高Ling總結了三招冧仔大法，而且女士們應該會相當受用。高Ling笑言：「男仔朋友聽完都覺得咁樣好加分，善解人意真係好重要！」到底邊三招，不如睇下！
第一招：識煮幾味
高Ling話識煮嘢食可以俘虜男仔心：「有一句說話叫做：『要箍住佢個心，最重要就要箍住佢個胃。』所以間唔中，唔需要做啲好複雜嘅菜，又或者係啲特別日子煮一餐飯畀佢食，親自整啲蛋糕甜品咁樣，我覺得男仔會好冧嘅。」
第二招：唔check對方手機
高Ling自言出於信任，所以不太喜歡睇男友的手機：「每個人都應該要有自己嘅個人空間，所以都唔會特登去問對方做緊啲咩，出街去邊呀之類嘅問題，因為我都需要空間。就算如果佢話畀我任check都好，我都係冇呢啲習慣。其實我由第一次拍拖，咁耐以嚟我都冇check過手機，呢個係本身嘅做法嚟。」
第三招：善解人意
這四個字不難理解吧，就是適當的時候做適當的事，高Ling說：「例如佢同Boys玩緊、傾緊偈或者睇緊波，呢啲時間都係屬於佢同朋友，我會完全畀佢喺出面enjoy自己嘅時間。我自己都會有girl's night，所以我覺得呢啲都係雙方面嘅配合。」
這三點其實好簡單，如果要實踐的話會點呢？男友要外出睇波，高Ling反而就話：「其實我都鐘意睇波㗎，如果佢出去睇，我都會舉手問：『可唔可以帶埋我去呀？』因為我之前要做世界盃嘅主持，我都學識咗點樣去睇波，所以我都可以投入埋呢一個球賽，甚至我比其他男仔更加鐘意睇波。」
有好多女仔都會陪男友去睇波，但偏偏就會問一些令男友苦惱的問題，要數令男友汗顏的問題第一位，應該就係：「BB，咩係越位呀？」用時間解釋，女方又唔知明唔明，好容易就會失去睇波的心情，為免掃興，女仔們還是自行腦補啦！不過，愛上睇足球的高Ling就知道甚麼是越位，真係世界級女友。高Ling話用口講好難，所以用圖片配合，大家去片睇下啦！
連咩係越位都知，對高Ling真係加爆分。問到高Ling最愛邊一隊球隊？她說：「我最鐘意西班牙隊，雖然佢哋身型比較矮，但佢哋真係好有技術。（鐘意邊個球星？）鐘意沙維，不過佢而家好似冇踢嚕。」睇嚟高Ling唔係得個講知，真係有留意，好charm呀！