【不懂撒嬌的女人】6呎袁文傑原來係貓奴 為貓哭崩：希望你原諒
近期因為《不懂撒嬌的女人》飾演游生一角，兼有亞視Oppa之稱的袁文傑，因為太型喇！所以近期人氣急升，受到熱烈嘅討論。他除了生得高大威猛，熱愛球隊阿仙奴之外，還有一顆愛心，原來他當了貓奴已經六年，更一度是兩貓之父。不過，當貓奴這些日子，袁文傑曾經歷過喪貓之痛，就是1歲的異國短毛貓囡囡5年前離開了這個世界，袁文傑至今難以忘懷，仍有點自責。昨日他在微博發文悼念囡囡：「乖囡囡，走了6年，離開前很痛、很苦，Daddy已盡力，但自知做得不夠好，希望您原諒，您好乖，一直都是！ 」
6年前，袁文傑朋友的貓剛巧生了幾隻小貓，向來愛貓的袁文傑，立即點頭收養其中兩隻異國短毛貓咪。袁文傑自稱做Daddy，每天努力照顧囝囝與囡囡，非常體貼。不幸地，囡囡一歲時，罹患了不治之症。袁文傑當時很徬徨，雖然囡囡患的是不治之症，但是他非常渴望有奇蹟，每天都餵囡囡吃藥：「呢啲嘢真係唔識，但我好想佢好返，見住佢咁得意，唔捨得佢走，曾經我仲同囡囡講：『只要你好返，daddy短幾年命都肯。』只係想有奇蹟發生喺佢身上，但眼見佢真係好辛苦，日日食藥又好攰咁，我都曾經都有同佢講過：『不如幫你打針，等你舒舒服服咁走。』佢眼仔碌碌咁樣望住我，之後我就冇咁做，因為我真係好唔捨得。」直到囡囡的生命進入末路，袁文傑憶述這段時間，他曾說過一些讓自己不好意思，甚至後悔的說話：「嗰日我就同囡囡講：『daddy真係好攰。』佢聽到就眼定定望住我，之後我就瞓咗，過幾個鐘醒咗，就見到佢用盡所有力氣行過嚟我身邊，但最後暈低咗。到我送到去診所，佢就過咗身，嗰一晚係我成年之後，一個麻甩佬，係大庭廣眾喊到痴咗線......」囡囡的離開，袁文傑還是歷歷在目，讓他更加愛惜囝囝，如今已經8歲。與女朋友Jacqueline感情穩定的他，不考慮生小朋友：「我同女朋友都好鍾意囝囝，好好哋照顧佢。」
袁文傑極度支持「領養，不棄養」，提起有些不負責任的主人，養到中途就遺棄，袁文傑有點氣憤：「真係好憎啲人養養下就唔理佢，求其搵條繩綁埋佢一邊就算。如果想得到開心，咁睇場戲咪算囉，點解要養養下，過咗道氣又唔要？見到呢啲人真係好想鐘佢幾下！」所以袁文傑有時都會在社交平台分享關注動物的消息：「我有朋友問我做咩要成日share，睇得多真係冇感覺，但我就覺得呢樣嘢好重要，動物都係生命，點解我哋要唔尊重佢哋呢？虐待人擺明係有心，係容忍唔到。」