吳若希今晨誕B女Giselle　靠許廷鏗「催生」準時出世

24歲的吳若希（Jinny）自去年11月宣布陀有B女後，今日正式升格做人媽咪喇！有報道指吳若希昨晚作動，老公即時送她入院，經過十多個小時之後，囡囡於今早出世，取英文名為Giselle。吳若希的Instagram暫時未有更新，她兩天前還講到剪指甲剪到餓，但因為有了BB，未能盡情大吃大喝的心情，現在為食的吳若希終於可以放縱一下，不過生完B女，月還是要坐，口都盡量要戒。

記者致電過吳若希的好朋友許廷鏗，他表示Jinny昨晚作動時都有傳短訊給他，覺得有種莫名的感動：「其實都等咗好耐，因為一直都睇住佢，由之前喺台灣拍MV，唔係好知佢有BB，到之後知道咗，係見證住成個過程，都真係好感動。」許廷鏗笑言自己有催生功能，被封為「催生鏗」，「之前同謝安琪、一個化妝師同埋Jinny去食飯，3個大肚婆，食完冇耐，化妝師同Kay都生咗，係差Jinny；早排再同Jinny去食飯，睇下有冇用，因為Jinny好想23號呢個日子生，最後BB都準時出世，仲要順產，真係好開心。」

許廷鏗今日有工作在身，未能親自去探BB及Jinny，他形容Jinny「攰得嚟又好精神」這種初為人母的興奮心情，而他早前在日本睇演唱會時，有特意去買一些適合BB的用品。許廷鏗說到最後，興奮的心情仍未平伏：「兩、三年前佢仲係一個o靚妹，早排見到佢抱住個肚，一臉滿足，成為咗媽媽，真係好奇妙。」他還大讚BB女取名Giselle取得好，大個一定係靚女，還透露BB女未出世時，雙腿比其他同周期的BB長，將來應該會有Model身型。