【主人我返嚟喇】孫慧雪陀B仍然愛毛孩：狗仔會識照顧小主人
《主人我返嚟喇》今集有阿雪（孫慧雪）和她的主人Moji，今次邀請阿雪有特別原因，她家中有4隻狗狗，而大家都知她即將生BB，她會是沒有良心的狗主，一生BB便棄養狗狗嗎？抑或有特別的方法令兩者和平共處？阿雪原來早有準備。
阿雪有兩隻松鼠狗、一隻芝娃娃和一隻貴婦狗，由於她陀住BB，所以只方便帶貴婦狗Moji出來接受訪問。Moji眼仔碌碌非常可愛又黐身，阿雪把牠放在地上，Moji不會分心四圍走，只會一直望着她又不停撲她的小腿，可見平時阿雪有多愛錫她的狗狗，她也肯定地說，不會因為有BB便棄養：「絕對唔會！因為我已當佢哋係屋企人，冇理由因為有小朋友就唔要佢哋嘛！」原來阿雪經常去做義工幫助流浪狗，遇過很多要仔唔要狗的家庭，令她很氣憤：「我都幾嬲㗎！生小朋友係一個計劃，你養狗都知道起碼有十歲啦！你應該知道未來十年會唔會有小朋友，你會知道隻狗依然喺度嘛，所以我覺得養寵物一刻就應該諗清楚，唔可以有BB就唔要隻狗。」
她說已為BB和狗狗的相處做好準備：「我哋猛咁上網睇一啲狗仔同BB同相處嘅片，好期待呢樣嘢！我覺得狗仔天生有使命感，佢應該知道嗰個係小主人然後照顧佢。」阿雪這樣說絕對有理由，她稱自從發現有了身孕，家中狗狗對她的態度也有神奇的轉變：「以往我瞓喺張床度，佢哋（狗狗）就全部跳晒上我度，會跳落我個肚度，好大力；但我有咗BB之後佢哋好乖，佢哋係咪有靈性係知道呢？我坐梳化佢哋又只會坐我大髀唔會跳喺我個肚度，佢哋可能真係知道。」
阿雪陀住5個月BB依然好靚，而她與老公為保持神秘感，還未想知BB是仔定女。「我哋選擇唔知，根本猛咁估囉！我想係仔，佢（老公）就想係女，因為佢覺得女會黐嗲哋，仔會黐媽咪，我哋大家都好想搶，想BB黐住自己。」當然仔女一樣咁愛錫，而且阿雪講明唔會偏心，無論BB定狗仔一樣會如珠如寶錫到燶。