【專訪】湯洛雯唔認拖羅天宇 孖住旅行照Friendzone：一個好朋友
TVB劇集《與諜同謀》的劇情就快進入最後直路，這套劇除了千辛萬苦找來離巢多年的羅嘉良擔正做膽之外；有網民見到劇集陣容，有李佳芯、黃心穎及湯洛雯，不禁問了一句：「《學是學非》劇集版？」這也是無可厚非的，她們三個都因著「是非精」成功入屋，觀眾看慣了她們大癲大肺，突然chok樣入戲會覺得怪怪的。
而3位是非精當中，李佳芯上位上得快，一早擔正做女一；黃心穎呢？都頗有觀眾緣，最近與城中著名王老五馬國明傳緋聞，傳到情侶檔搵真銀，網民都相當受落；至於湯洛雯，自《愛﹒回家》裡飾演思思而為人熟悉，最近除了《與諜同謀》外，接下來還有新劇出街，keep住曝光。在際遇上，湯洛雯似乎也開始漸入佳境。
同樣是「是非精」的湯洛雯，其實過去一年都有不少演出，例如《潮流教主》及《完美叛侶》等，但奈何幾套劇播出的檔期，未能湊合出「天時地利人和」，令她的演出未獲得留意。這樣的現象，湯洛雯又會否覺得可惜？她坦言：「作為一個演員，想自己嘅演出有人留意都好正常。不過同一時間，藝人嘅付出都未必成正比，自己畀心機做但效果同想像中有出入，我都唔會唔開心，因為其實都係正常現象，唯一可以做就係每次都盡最大努力，總會有人係睇到。」湯洛雯說罷，還是很謙虛，覺得就算努力，她的演技還有多進步空間，只敢講：「而家都算上手咗少少。」
那麼其他「是非精」呢？大家雖然同出一門，但現在各有千秋，發展有快有慢。就算自己不比較，都會有旁觀者自行比較。偶爾翻過社交網站，都會有網民討論「邊個是非精最紅？」、「咁多是非精你會揀邊個？」搞到「是非精」之間無形舉行了競技賽，湯洛雯聽完笑笑口，說：「我touchwood先，覺得自己so far發展得幾好喎！」同其他「是非精」沒有所謂的競爭，大家都是拍住上，而且電視圈裡，都沒有誰人一支獨秀的定律，如是這般說：「都係最好自己最重要啦。」
除了「是非精」，湯洛雯的關鍵詞還有「湯鎮業姪女」，這個稱號由她參選港姐，伴隨到現在。對於藝人來說，標籤就如吊靴鬼；一旦被定型，設法搣甩都幾頭痕。湯洛雯坦言這個稱號，容易讓人覺得有護蔭，以前聽到會影響心情：「其實呢個問題幾年前開始有，初時會有唔開心。因為出街都係叫我邊個邊個姪女，我都會好擔心會唔會一直都畀人咁叫呢？但最近好得意地，好似多咗人叫得出我個名，唔係叫我乜乜姪女，唔係叫我是非精，多咗人知道我係邊個，所以而家都唔會特別介意叫我做其他稱號，我最想就係有人記得。」
另一邊廂，湯洛雯入行快5年，緋聞傳來傳去就只有羅天宇，間中都會被傳媒見到兩人私下會出下街，緋聞又再翻傳，兩人關係似乎不言而喻，到底孰真孰假？湯洛雯就話件事其實好好笑：「有一次話我哋大合照，我係挨住佢，但其實個空間真係好細，我攝咗個位入去，就話我係挨住佢，大家睇返其實都係得啖笑。」不過同一個人，傳幾次緋聞喎，真係一啲感覺都冇？湯洛雯似乎Friendzone了羅天宇：「佢係我一個好好朋友，係其中一個Bestfriend，大家得閒都會出嚟食個飯。」真的沒有發展可能嗎？「將來嘅嘢，冇人會知嘅。冇話一定唔得，一定得。」，可是，湯洛雯都認同羅天宇是一個好男仔，但始終「你揀人，人揀你」，與其尋尋覓覓，不如寄情工作，當係麻醉自己，反正屋企人都唔急。