【與諜同謀】黃心穎工作狂入晒血　讀書一定要第一：係咪好變態？

打工仔遇到上司無能，縮骨卸膊，當然是有苦自己知，但原來在職場上，上司太過能幹，事事爭第一的工作狂，才是上班族最大的天敵。在無綫劇《與諜同謀》中，黃心穎飾演的卓敏莉，是公司大老闆羅嘉良的女兒，讀完書返港，即時加入公司當上市場部經理，跟鄭俊弘各帶一隊人，由朝鬥到晚，最受罪的莫過於黃心穎的幾位下屬。

劇中黃心穎第一日返工，她自我介紹時已經知道她不易相處，「我做嘢嘅宗旨好簡單，解決晒啲問題，就可以收工。」女下屬即問她「如果解決唔到呢？」心穎即自信爆棚，回應「呢個世界冇解決唔到嘅問題。有，都係因為自己未盡全力。」睇到這裡，跟她的下屬齊齊嚇到面青，以心穎的講法，即是大家不用收工，而劇情發展下去，亦一如所料，心穎帶領的一隊人要開OT，最慘是看着鄭俊弘的一隊，可以輕鬆準時收工，梗係葡萄啦。

新老細上場，一班下屬亦相當識做，話跟心穎食飯賀新入職，正當大家興高采烈，商量去食什麼菜之際，心穎再次打沉大家，她說「食飯唔係我優先考慮，我會先選擇開會，時間寶貴。」跟着心穎帶住幾位下屬到會議室，逐一問他們的idea，突然要開會交功課，當然是人人啞口無言，此時心穎相當「體諒」下屬，她說：「我知道係咁短時間，要諗一個新idea比較難，好啦，俾多啲時間大家，聽朝每人一份proposal。」全場鴉雀無聲，面面相覷，估計心聲是「呢次慘啦」。

黃心穎接受《香港01》記者訪問，她承認現實生活中她亦是一個工作狂，「以前讀書真係會背晒成本書，一定要第一，細個對讀書都幾執着，係自己迫自己，好開心可以做返呢類型角色。依家都想自己做多啲嘢，好驚要放假，因為趁後生要闖耐啲。(有冇遇過工作狂上司？)可能遇到咁嘅人，都冇為意，自己都鍾意呢種模式，係咪有少少變態？」原來之後心穎的下屬終於壓力爆煲，「我會被同事玩返轉頭，佢哋真係頂唔順，佢哋會整啲笑我、惡搞我嘅片放上網，話我係變態上司。劇情後段會好啲，因為撈家即係我劇中爹地，佢會一直磨練我，因為我係起晒角架嘛，磨返圓我。」但心穎就不介意遇上工作狂上司，「視乎嗰個人嘅態度。工作狂？正呀，要求高即係睇得起你，要睇吓自己有冇信心做好件事。」

不過咁心穎如此博命，當然有回報啦，她提出的推廣計劃，很快已經獲得大老闆羅嘉良接納，而心穎還喜孜孜跟下屬說「請大家下午茶，任叫」，可惜幾位下屬表面無事，但轉頭已密密斟「未贏都咁搏，贏咗咪有排捱」，之後一班同事當然做到面青青，更有女同事捱到胃痛，到了放工時間，有同事問心穎「走得未？」她只說：「我都知大家辛苦，已經叫咗外賣慰勞大家，唞一唞再做過啦。」《與諜同謀》至今只播了幾集，是否膠劇仍然言之尚早，但在辦公室這一部分的戲，卻寫得相當貼地，完完全全有機會發生在你或我身上，而心穎演繹工作狂上司入型入格，跟以往的傻大姐形象截然不同，不知道會否嚇怕一班OL和打工仔呢。