張曦雯主人係最萌肥貓 同機神一齊瞓：望住佢賣萌都好開心
這個世界上，能夠統治到人類的，除了貓，應該就只有貓。所以各人類被喵星人降服之後，都會自稱貓奴，完全心甘情願被牠們管治。最近打機打出名堂的張曦雯（Kelly）就是其中一個範例，她愛「主人」Louie愛到要開埋ig（kinglouiethetiger）！裡面全都是Louie的生活萌照，牠天生有一對大眼睛，加上毛色亮麗，身形肥嘟嘟，吸引了其他貓奴以及喜歡張曦雯的粉絲follow。一隻可愛貓，在短短兩星期內吸引了2千名fans追蹤，真的很厲害。而Louie的自我介紹一欄裏說：「 專長：食、瞓、睇奴才打機」、「幾點開台我話事，喵」真係好有主人風範，個腦即刻有聲，真係好萌啊！
記者致電貓奴張曦雯，她講起「主人」也相當甜絲絲。Louie今年已經6歲，當時張曦雯由美國返港發展，牠就開始陪伴奴才。而「主人」之所以叫Louie，原來張曦雯因為想他gentleman一點：「我想幫隻貓改個人名，等佢真係好似個人咁。加上Louie本身都係皇帝名，聽起上嚟就會覺得佢好gentleman，之前我送咗隻貓畀細佬，都係改咗個類似嘅名，令到隻貓好似有個人character咁。」
眾所周知，貓之所以擔當主人角色，源於牠們難以捉摸，往往都要奴才服侍返轉頭，都幾難養熟。張曦雯雖然甘於做奴才，但她卻表示Louie比較黏人：「有些貓都喜歡躲在一角，但Louie不會，平時我回到家，就會見到佢在門口等我回來，又會讓我抱，面對陌生人又不會細膽。」而張曦雯有時候要出trip，Louie就算交由其他親戚照顧，都不會怕生：「喺呢方面佢都幾outgoing同獨立，所以我都好放心。」
張曦雯話Louie除了乖，仲好為食：「佢好鍾意食，除了一日食兩餐，有時見到我食嘢，佢就會走過嚟想食。」於是貓奴張曦雯就透過食物來馴服主人Louie：「佢有時好似狗狗咁，我會畀食物之前，叫『hand hand』，久而久之佢就識畀手手。之後教埋佢『請請』，佢就舉高兩隻手，重覆一句說話等佢聽熟，佢就會知道做咩。」所以Louie有時候肚餓想吃東西，牠就會走過去張曦雯身邊，然後「hand hand」想要食物，是個非常聰明的喵星人。
而近來張曦雯在網上直播打機，Louie都會在身邊睇住奴才玩game，不過有時牠為了嗲張曦雯求玩，都會出盡辦法吸引注意，張曦雯說：「有時打打下機佢就會走過嚟咬我膊頭，想我陪佢玩。有時我做主持打開電腦背稿，佢就會坐過嚟分散我注意力。」Louie如此黏人，張曦雯都有想過添個伴陪牠：「但都會驚佢唔慣，同埋佢甩好多毛，我本身有鼻敏感，怕多一隻會唔適應。」不過就算未有玩伴，現在有得望住Louie賣萌都好開心！