【BIOHAZARD 7】Pearl Tonight日日打喪屍 張曦雯:連續打9個鐘

除了一個肯挨麥記的女友外,作為男人又何嘗不想有個識打BIOHAZARD 7的女友呢?這種女友估計無人相信會存在,怎會想像到TVB女神 Pearl Tonight主持張曦雯正是,她最近在twitch開戶直播自己打BIOHAZARD 7,引來網民、機迷爭相觀看女神打機。

不要以為女神只是「做樣」完全不懂打,張曦雯打得有板有眼,不少網友在連登討論區都贊她有技術,還贊她打得好肉緊,更自然地講英文,經常在鏡頭前講what is that ? Come on Come on,不少網友覺得聽到女神講英文已值回票價,更希望張曦雯直播教英文,而除了看她打機,張曦雯只貓Louie亦是焦點,Louie全程坐在張曦雯旁邊,有時天然呆,有時又望下主人打機相當得意。張曦雯接受《香港01》訪問,她亦自認「機痴」,她說:「我打機因為我細佬,打機系我同佢溝通嘅橋樑嚟,令我哋增長感情,我第一次打機系PS one,Dynasty Warriors(三國無雙)我鐘意用劉備,因為可以兩個人玩,所以同細佬好鐘意玩。BIOHAZARD 7我第一次玩㗎咋,好鐘意打zombie game,之前就打Left 4 Dead,我好鐘意玩呢啲,好變態,唔知,鐘意折磨自己啩…哈哈。」
女神打機絕對商機無限,但原來部機同只game都是張曦雯自己掏腰包買,她說:「好多人都以為有人畀錢我打,其實我自己買㗎,以前都有xbox,但之後都送畀人,因為我玩得太多,我要控制下,我真繫好沉迷,呢只BIOHAZARD 7,未做twitch前,我已經打,我係連續打咗9個鐘先停,我好似冇食過嘢,只貓Louie就一直陪着我。」
張曦雯在上月29日先開twtitch戶口,初時只得百幾人收看,但昨晚直播,高峰期有二千人,令她非常開心,她說:「我冇諗過咁多人睇,但最開心有人睇到我真性情,平時大家喺電視見到嘅,未算系真正嘅我,我想大家知我喺點,所以大家有時見到我打打下爆粗㗎,好正常啫,過唔到關真繫好忟,掟手掣都試過。」
張㬢雯亦愛和男朋友打機,她說:「我鐘意同男朋友一齊打機,不過嗰啲打得唔叻囉,我覺得女仔點解唔鐘意打機呢?可能覺得無得同男朋友一齊玩,如果可以一齊參與,應該冇咁抗拒,我會同佢哋打Halo,Call of duty,(打機叻會唔會易追求妳?)哈哈…呢個唔系我嘅criteria,不過如果你打機勁,我都覺你幾型嘅…(網友話妳無男友先打機喎?)系啦,大家見到我咁慘一個人打機就知啦,不過無嘢嘅,我都好開心。我而家最想系挑戰達哥打機,因為我都有睇佢嘅打機片。」沒有男友這句話相信是機迷最想聽到的。