李家鼎預告《阿爺廚房》7月有第二撃：我想教煮經典易上手懷舊菜

去年12月，出名耍功夫勁的李家鼎孖住譚玉瑛主持飲食節目《阿爺廚房》，鼎爺在節目使出快、狠、準的刀功，令觀眾眼前一亮。加上鼎爺教大家煮買少見少的懷舊菜，表現手法絕不扭怩，被網民一致譽為「最佳飲食節目主持」，就連飲食節目主持元祖方太（方任莉莎）都忍不住在微博撰文高度讚揚鼎爺，可想而知節目幾咁受歡迎。

TVB見鼎爺下廚如此好反應，於是有意將《阿爺廚房》添食，讓觀眾再度見識鼎爺的廚藝。而鼎爺早前出席活動時，亦承認節目將會有第二撃，並且暫定7月開拍。記者事後再致電給鼎爺，他表示：「公司初步就係咁講囉。」至於搭檔方面，過往都有不少網民建議換一換人，更希望拍檔年輕一點，睇起上嚟有點反差就最過癮。不過，鼎爺率先披露與譚玉瑛再度拍住上同大家見面，更問記者：「咁梗係同佢做拍檔啦，咁有咩問題？」似乎對譚玉瑛都好有信心，無疑粉碎了鼎爺被指不滿對方的傳聞。《阿爺廚房2》都是與首輯一樣，教大家煮經典懷舊菜，問到鼎爺最想煮邊個菜式，他說：「都係等公司安排，有好多都好想煮，同時都要睇下有冇mood嘅，最想教觀眾煮啲經典得嚟又好易上手嘅菜式囉。」看來鼎爺都想為節目賣賣關子先，大家就要等多幾個月，等阿爺再出手喇！