【阿爺廚房】方太讚鼎爺「有聲有藝」 鐵漢好謙虛：受之有愧呀！
自從李家鼎（鼎爺）與譚玉瑛合作主持飲食節目《阿爺廚房》，好評如潮，皆因鼎爺展現一身好廚藝與好刀功，令不少觀眾刮目相看，炮製出的一道道懷舊菜式，勾起不少觀眾的回憶，不禁大呼：「好有家嘅感覺啊！」不單止網民讚好，就連煮食節目代表人物「方太」方任利莎都有留意鼎爺，仲喺微博寫道：「觀賞鼎爺主持的烹飪節目，有聲有藝不卑不亢不自誇題材資料別有風味，引人入勝，是我認為最佳的烹飪節目。」方太更表示，如果有機想向鼎爺偷師㖭呀！真係勁過拎5星星！
鼎爺得知獲煮食節目icon方太最高的讚賞之後，即刻受寵若驚，表示難以置信，「我真係受之有愧呀！方太真係好叻，我之前有睇佢節目，堅係有料。呢個世界山外有山，天外有天。多謝佢欣賞我，有機會我都要請教佢呀！」不過，方太除了力讚鼎爺，都有講到：「如果旁邊那位姐姐能少些說話更好，其實搶話並不能出位適當的時候發言會令人更欣賞的綠葉，忠言逆耳望見諒。」嫌譚玉瑛姐姐有啲煩喎，鼎爺又點睇？佢就話：「咁又真係無辦法，咁做拍檔有時都要搞下氣氛，我自己對佢就ok滿意，佢都識煮下嘢食。」聽講《阿爺廚房》會開第二輯，鼎爺就話唔清楚，但如果方太做佢拍擋，又肯唔肯？鼎爺即刻二話不說：「She is a good partner！」鼎爺，要靠你氹方太出山啦！
除此之外，早前有網民叫鼎爺可以拍香港版《深夜食堂》，鼎爺聽完即刻話咪搞：「40年前我都做主角，40年後仲做主角？你叫我煮下嘢食、賣下刀就得，做小生位？搵鬼睇！（好多人話一定睇喎！）唔好啦！拍第2輯《阿爺》我就得！」
精選「阿爺」懷舊菜
熟悉的菜式，熟悉的味道，由鼎爺展身手再次烹調出來，讓觀眾可以透過電視都聞到這種屬於「廣東人」的味道。一班網友就揀出以下幾道精選菜，他們除了表示看到食指大動，仲想穿上圍裙落廚親身研究！不過鼎爺提提大家，煮懷舊菜並無捷徑！大家畀心機學啦！
【兩面黃煲仔飯】
風起了，是時候食煲仔飯了！很多以為在家那有可能煮到煲仔飯？鼎爺就話你知Nothing is Impossible，加塊咸魚同條臘腸，香氣立即撲鼻而來。網民最動心的，莫過於煲底的飯焦，因為是整煲飯的精華，鼎爺在節目中就傾囊相授。
【古法鹽焗手撕雞】
還記得鼎爺介紹這道菜時，帶譚玉瑛姐姐到紙紮鋪......買紗紙。一般鹽焗雞都是用白紙，鼎爺就話用紗紙包住隻雞，可以令水分及不好的東西滲出來，然後就可以將鹽香完全滲入隻雞到，連紙的材質都如此講究，真是服了鼎爺。
【砂鍋魚頭】
這款菜同是網民最愛，睇見都要流口水。鼎爺教大家整魚頭煲的時候，其下酒方法讓大家嘖嘖稱奇，原來這樣可以辟腥味，不禁話：「又有秘技學！」、「長知識了！」
【魚腸煎﹑焗蛋】
利用魚腸做料理，食落去就好食，做法就真是…一個字「難」！首先要針對腸的處理，因為是內臟關係，第一就要清洗去除當中的味道。鼎爺節目中，除了烹調之外，就好用心教導大家如何辟除腥味及苦味，等大家煮起上來更易上手。