【阿爺廚房】李家鼎為頒獎禮整炸雞手都軟：朝早９點開始煮

最近睇《阿爺廚房》，平時充滿霸氣的李家鼎，一揸住菜刀溫柔講解菜底煮法，證明了「鐵漢柔情，真係勝過黎明」的道理。今日鼎爺孖住譚玉瑛拍攝節目最後一集，親自炮製新年食品芋蝦，有得煮嘢食，鼎爺全程笑晒口，就好想叫佢拍返套《深夜食堂》香港版。

鼎爺煮出個名堂，昨日與譚玉瑛聯手，由朝早9點開始，落手製作百多人份量的炸子雞及糯米釀雞翼，為的是昨晚台慶頒獎禮的食雞環節，兩人整雞都用了大半天：「整到show前大半個鐘先整完，一路拎住個鑊鏟攪到手攰，好在個人無散晒。」

節目拍到最後一集，說話豪爽的鼎爺就大力拍咗譚玉瑛背脊一下，話要講對方秘密：「就係譚玉瑛幫我慳咗二千幾蚊，我就同工作人員講，如果佢成日無買過嘢，第二日三餐我包！講完心諗死啦，真係要打開荷包，好在譚玉瑛最後都有買嘢，真係多謝佢。」譚玉瑛在旁邊就話因爲自己鐘意買香料。