【Seasun對手】極品港女月儲105%　零支出為買樓：八達通家人增值

22歲拜金港女Seasun，在宣傳無綫的新節目《有樓萬事足》時，連環爆出金句，「冇樓唔好白撞」、「有樓有高潮」，不但掀起全城熱話，更令Seasun成為最新的負評王，被網民洗版式批評。不過真心講句，今時今日買樓不靠父幹，就只能搵個富二代？原來節目中仲有其他「自食其力」的方法，另一為買樓去到盡既代表Macy，就是全靠死慳爛慳，月儲105%，真係好大決心。

其實點可以月儲105%如此神奇？無他，最簡單莫過於一味靠黐，節目中Macy自爆每個月零支出，她表示「第一樣嘢，擅用身邊資源，八達通亦都係屋企人會支持我嘅，去lunch同朋友食飯咪用八達通嘟，嗰筆錢咪可能轉嫁咗畀屋企人。」原來如此，即是食屋企住屋企，而她行街消費之後，埋單找數這些粗重功夫，當然由男友負責啦。咪住？心水清的網民幫Macy計計數，全份糧儲起都是100%，餘下的5%呢？雖然Macy無畀家用，但就用份糧來炒股，贏輸拉勻平均都有5%進帳，所以話月儲105%完全無難度，大前題是「錢字行先，家人放旁邊」。

不過一家不知一家事，或者Macy媽媽不用女兒畀家用呢？節目會訪問埋Macy媽媽，兩母女當面對質，而Macy媽媽就話：「我唔係好開心，我話：妳做嘢都冇家用畀我，咁自私而去買層樓。」看來Macy媽媽亦不大贊同囡囡的儲錢方法，甚至話囡囡自私，只是Macy一意孤行，無計。在旁的Macy卻為自己行為申辯，她表示「我自己已經係慳得好辛苦，我覺得妳應該畀啲鼓勵支持我。」為了層樓，影響了母女感情，何必呢？或許正是現今的畸形樓市，令年青人衍生出一味為自己打算的「獨家」心態，最終又是土地問題。