無綫真人騷爆拜金對白 22歲港女：買樓先係表達愛嘅方法
TVB過往都會製作一連串話題性的節目，真人Show《沒女大作戰》、《盛女愛作戰》依然記憶猶新。《盛女》入面，兩性專家Santino講到需保持45度角姿勢與異性溝通，引起網民強力恥笑。早前推出《沒有起跑線？》，因有幼稚園一年只收10名1月份出生的學生，要計盡時間生出1月寶寶先得，而其中一位家長提出「贏在射精前」的言論，此話引起嘩然，覺得這種怪獸家長好恐怖。
而這些引起爭議性的節目，都出自編導岑應之手。她今次再有新作，就是實況節目《有樓萬事足》，將會在2月20日一連播5集。節目邀得一班不同背景、不同心態的香港人，如何在樓價飆升的時期，用盡千方百計置業。買樓這個話題一直都拗緊，今次也不例外，有金句有晒驚爆言論，看來又要引起一番爭議。
節目的第一集，就已經有22歲妙齡少女Seasun講出驚人言論，看她有身材又後生，眼角原來都好高。她對於買樓的看法，延伸到擇偶條件，必先要有樓先有say，仲覺得有2千呎是基本，例如何文田舊樓就啱佢心水，Seasun認為：「男方買樓才是表達愛的方法！」更直言：「冇樓嘅話就唔好白撞。」Seasun這番豪語，似要挨罵多過搵對象，而各位男士覺得值唔值得？見仁見智了！
不過，正當大家以為《有樓萬事足》只不過是港女發聲筒時，都有個別case。另一位32歲熟女Inky就不介意另一半冇樓，因為自己由小到大都死慳死抵，早前靠自己買樓，都夠住。對她來說，目前希望「有樓招親」，只想有真愛降臨。剛巧節目又有男受訪者講到港女現時人工高，要調返轉搵個有樓嘅女人。唔知一眾男士又介唔介意？
愛樓港女Seasun住過趙世曾大宅 17歲做公關兼任珠寶模特兒
除了素人，節目都有藝人分享對置業的看法。就好似28歲的張秀文，本身她公屋出身，冇樓在手，現時以一萬元租兩房單位。大家以為做藝人買樓容乜易，但張秀文就慨嘆做藝人要買樓同打工仔一樣難，甚至更難，真係要有一筆錢放喺度，還自爆：「預計嚟緊六個月都冇工開。」對於買樓，她似乎都沒有太大信心，皆因租屋已經夠晒甘：「樓價年年升，租金步步高升，可能交咗30年租都仲未成為業主，但係就養咗班業主30年。」聽落都好似幾心酸。節目將於下星期一播出，而家就聽到咁出位的言論，未知到時會唔會有班人爭住認同有樓就是一切呢？